یونیورسٹی آف ایجوکیشن لاہور میں ون ہیلتھ کانفرنس اختتام پذیر، بین الاقوامی و ملکی ماہرین کا مشترکہ تحقیق پر زور

یونیورسٹی آف ایجوکیشن لاہور میں ون ہیلتھ تحقیقی کانفرنس اختتام پذیر

لاہور: یونیورسٹی آف ایجوکیشن لاہور میں منعقد ہونے والی دوسری بین الشعبہ جاتی تحقیقی کانفرنس برائے ون ہیلتھ (IRCOH 2026) اختتام پذیر ہوگئی۔

دو روزہ کانفرنس میں ملکی و غیر ملکی ماہرین، جامعات کے سربراہان، محققین، اساتذہ اور دیگر ماہرین نے شرکت کی۔ مقررین نے انسانی، حیوانی، نباتاتی اور ماحولیاتی صحت کو باہم مربوط انداز میں درپیش چیلنجز سے نمٹنے کے لیے بین الشعبہ جاتی تحقیق اور جدت کی ضرورت پر زور دیا۔

اختتامی تقریب کی صدارت یونیورسٹی آف ایجوکیشن لاہور کے وائس چانسلر پروفیسر ڈاکٹر عاقف انور چوہدری نے کی، جبکہ یونیورسٹی آف لنکاشائر برطانیہ کے پروفیسر ڈاکٹر احتشام الرحمن مہمانِ خصوصی تھے۔ کانفرنس کی چیئر پروفیسر ڈاکٹر شگفتہ عندلیب تھیں۔

کانفرنس یونیورسٹی آف ایجوکیشن لاہور کے اشتراک سے یونیورسٹی آف سرگودھا، پنجاب یونیورسٹی، گورنمنٹ کالج یونیورسٹی فیصل آباد، پاکستان اینیمل ہیلتھ ڈائیگناسٹک اتھارٹی (PAFDA)، کامسیٹس اور ہائر ایجوکیشن کمیشن سمیت مختلف جامعات، تحقیقی اور سائنسی اداروں کے تعاون سے منعقد ہوئی۔

وائس چانسلر پروفیسر ڈاکٹر عاقف انور چوہدری نے کہا کہ یونیورسٹی آف ایجوکیشن نے خود کو بین الشعبہ جاتی تحقیق کے ایک اہم مرکز کے طور پر منوانا شروع کردیا ہے۔ مختلف علوم کو یکجا کرکے پیچیدہ عصری مسائل کے حل تلاش کیے جارہے ہیں۔

مہمانِ خصوصی پروفیسر ڈاکٹر احتشام الرحمن نے کہا کہ ون ہیلتھ موجودہ دور کا اہم اور تیزی سے ترقی کرتا ہوا تحقیقی شعبہ ہے۔ انسانی، حیوانی اور ماحولیاتی صحت کے باہمی تعلق کو سمجھتے ہوئے ایسے تحقیقی حل تیار کرنے کی ضرورت ہے جو مستقبل کے صحت، ماحولیاتی اور موسمیاتی چیلنجز سے نمٹنے میں مددگار ثابت ہوں۔

IRCOH 2026 میں مجموعی طور پر 42 تحقیقی مقالے پیش کیے گئے، جبکہ تقریباً 200 سے 250 محققین، اساتذہ، ماہرین اور مندوبین نے شرکت کی۔ کانفرنس میں تین غیر ملکی مقررین اور تین بین الاقوامی کلیدی مقررین نے بھی شرکت کی، جبکہ فرانس، برازیل، ملائیشیا، انڈونیشیا، تھائی لینڈ، سعودی عرب اور چین سمیت مختلف ممالک سے علمی و تحقیقی تعاون سامنے آیا۔

کانفرنس کے مختلف سیشنز میں انسانی و حیوانی صحت، ماحولیاتی صحت، بائیوسکیورٹی اور موسمیاتی لچک سمیت اہم موضوعات پر گفتگو کی گئی۔

کانفرنس کے دوران پاکستان ون ہیلتھ یونیورسٹیز نیٹ ورک کا اجلاس بھی منعقد ہوا، جس میں ملک کی 32 جامعات کے وائس چانسلرز اور نمائندگان نے شرکت کی۔ اجلاس میں ون ہیلتھ کے شعبے میں جامعات کے درمیان تعاون، تحقیق، رابطہ کاری اور استعدادِ کار بڑھانے کے مختلف پہلوؤں پر تبادلہ خیال کیا گیا۔

مقررین نے زور دیا کہ انسان، جانور، پودے اور ماحول ایک دوسرے سے گہرا تعلق رکھتے ہیں، اس لیے کسی ایک شعبے کی صحت کو دیگر شعبوں سے الگ کرکے نہیں دیکھا جاسکتا۔ کانفرنس میں اس امر پر بھی زور دیا گیا کہ پیچیدہ صحت، ماحولیاتی اور موسمیاتی مسائل کا پائیدار حل جامعات، تحقیقی اداروں، سائنسی تنظیموں اور پالیسی ساز اداروں کے باہمی تعاون سے ہی ممکن ہے۔