انتقال کی خبریں جھوٹ، ’الحمدللہ میں بالکل ٹھیک ہوں‘ اداکار عمران اشرف نے خیریت سے آگاہ کردیا

عمران اشرف کے انتقال کی جعلی خبر سوشل میڈیا پر وائرل، اداکار نے تردید کردی

پاکستان کے معروف اداکار اور میزبان عمران اشرف نے اپنے انتقال سے متعلق سوشل میڈیا پر گردش کرنے والی جعلی خبر کی تردید کرتے ہوئے مداحوں کو اپنی خیریت سے آگاہ کردیا۔

تفصیلات کے مطابق سوشل میڈیا پر مصنوعی ذہانت (اے آئی) کی مدد سے تیار کی گئی ایک جعلی ویڈیو تیزی سے وائرل ہوئی، جس میں عمران اشرف کے انتقال کی جھوٹی خبر نشر کی گئی۔ ویڈیو میں مختلف معروف صحافیوں، کرکٹرز اور فنکاروں کی تصاویر اور مصنوعی طور پر تیار کردہ آوازیں استعمال کرکے تعزیتی پیغامات شامل کیے گئے، تاکہ جھوٹی خبر کو حقیقت کا رنگ دیا جاسکے۔

جعلی ویڈیو کے وائرل ہونے کے بعد عمران اشرف کے پاکستان اور بیرونِ ملک موجود مداحوں میں تشویش پھیل گئی۔

صورتحال کے پیش نظر عمران اشرف نے اپنے آفیشل انسٹاگرام اکاؤنٹ کے ذریعے وضاحت جاری کرتے ہوئے کہا کہ وہ بالکل خیریت سے ہیں اور ان کے انتقال سے متعلق خبر مکمل طور پر جعلی اور بے بنیاد ہے۔

تحقیقات کے مطابق یہ جعلی ویڈیو ایک ٹک ٹاک اکاؤنٹ پر اپ لوڈ کی گئی تھی، جہاں مصنوعی ذہانت کی مدد سے تیار کردہ اسی نوعیت کی متعدد دیگر گمراہ کن ویڈیوز بھی موجود ہیں، جن کے ذریعے مختلف معروف شخصیات سے متعلق جھوٹی خبریں اور افواہیں پھیلائی جارہی ہیں۔

اداکار نے مداحوں سے محبت اور دعاؤں کی درخواست بھی کی۔