آل پارٹیز کانفرنس میں شرکت سے متعلق عمران خان کااہم فیصلہ

راولپنڈی: بانی پی ٹی آئی عمران خان نے آپریشن عزم استحکام کے حوالے سے وزیراعظم شہباز شریف کی بلائی گئی اے پی سی میں شرکت کرنے کا فیصلہ کر لیا۔
190ملین پاؤنڈ کیس کی سماعت کے دوران اڈیالہ جیل میں صحافیوںسے گفتگو کرتے ہوئے کہا کہ بانی پی ٹی آئی نے کہا کہ ملک کی خاطر پاکستان تحریک انصاف وزیراعظم کی بلائی گئی اے پی سی میں شریک ہو گی۔ حکومت کا موقف سنیں گے اور معاملات کو باریک بینی سے دیکھیں گے۔ آپریشن عزم استحکام سے ملک میں عدم استحکام بڑھے گا۔آپریشن کے حوالے سے ہمارے تحفظات موجود ہیں۔ افغانستان سے ہمارا ڈھائی ہزار کلومیٹر کا بارڈر لگتا ہے۔معاشی حالات پہلے ہی خراب ہیں ، ان حالات میں آپریشن سے عدم استحکام مزید گہرا ہوگا۔ جب تک افغانستان کے ساتھ تعلقات بہتر نہیں ہوں گے ہم ٹی ٹی پی کو نہیں ہرا سکتے۔ اے پی سی میں آپریشن عزم استحکام کے حوالے سے اپنا موقف پیش کریں گے اور حکومت کا موقف بھی سنیں گے۔
ذرائع کے مطابق اے پی سی میں وزیراعظم تمام جماعتوں کو آپریشن کے حوالے سے اعتماد میں لیں گے۔ وزیراعظم بیرون ملک دورے سے واپسی پر تمام سیاسی جماعتوں سے مشاورت کر کے اے پی سی کی حتمی تاریخ کا اعلان کریں گے۔
واضح رہے کہ آپریشن عزم استحکام کے حوالے سے حکومت نے سیاسی جماعتوں کے تحفظات کو مدنظر رکھتے ہوئے آل پارٹیز کانفرنس بلانے کا فیصلہ کیا ہے۔
حکومتی ذرائع کے مطابق وزیراعظم شہباز شریف کی قازقستان سے وطن واپسی پر آل پارٹی کانفرنس بلانے کی تجویز زیر غور ہے ۔ آل پارٹیز کانفرنس بلانے کا مقصد تمام جماعتوں کو آپریشن عزم استحکام کے حوالے سے اعتماد میں لینا ہے۔
وزیر اعظم شہبازشریف کی وطن واپسی کے بعد اے پی سی کی تاریخ اور وقت کا تعین کیا جائے گا۔ حکومتی ذرائع سے یہ امکان بھی ظاہر کیا گیا ہے آئندہ ہفتے اے پی سی بلائی جا سکتی ہے۔
آپریشن کے حوالے سے اپوزیشن جماعتوں کو شدید تحفظات ہیں۔ پی ٹی آئی سمیت دیگر جماعتوں نے مطالبہ کیا تھاکہ آپریشن عزم استحکام کے حوالے سے تمام جماعتوں کو اعتماد میں بھی لیا جائے۔ اس کے علاوہ جماعت اسلامی اور جمعیت علما اسلام بھی آپریشن کی مخالفت کر چکی ہیں۔
حکومت کی اتحادی جماعتوں نے آپریشن عزم استحکام کو ملک کی ضرورت اور اس کو فوری شروع کرنے پر اتفاق بھی کیا تاہم بلاول بھٹو کا گزشتہ دنوں کہنا تھا کہ اس معاملے پر پھر بھی وفاقی حکومت کو تمام جماعتوں کو ایک ٹیبل پر بیٹھنا چاہیے تاکہ ایک مربوط حکمت عملی کے ساتھ ملک کو آگے بڑھایا جاسکے۔