کورکمانڈر کانفرنس: ملک میں پائیدار استحکام اور معاشی خوشحالی کے لیے ‘عزمِ استحکام’ ناگزیر

راولپنڈی: پاک فوج کی کور کمانڈرز کانفرنس نے دہشتگردی کے خلاف جنگ میں آپریشن عزمِ استحکام کو ایک اہم اقدام قرار دیا ہے۔
آئی ایس پی آر کے مطابق، آرمی چیف جنرل سید عاصم منیر کی زیرصدارت 265ویں کور کمانڈرز کانفرنس منعقد ہوئی۔ اس کانفرنس میں شہداء، پاک فوج، اور دیگر قانون نافذ کرنے والے اداروں کی قربانیوں کو خراج تحسین پیش کیا گیا۔
آئی ایس پی آر نے بتایا کہ کچھ حلقوں کی جانب سے آپریشن عزمِ استحکام پر بلاجواز تنقید کی جا رہی ہے، جس پر فورم نے تشویش کا اظہار کیا۔ فورم کا کہنا تھا کہ یہ قیاس آرائیاں مخصوص مفادات کے تحت کی جا رہی ہیں۔
کانفرنس میں علاقائی سلامتی، خاص طور پر افغانستان کی صورتحال پر بھی غور کیا گیا اور علاقائی امن و استحکام کے فروغ کے لیے عزم کا اعادہ کیا گیا
پاک فوج کی کور کمانڈرز کانفرنس میں شرکاء نے ریاست مخالف بیرونی طاقتوں کی سرپرستی میں جاری ڈیجیٹل دہشتگردی پر تشویش کا اظہار کیا۔ آئی ایس پی آر کے مطابق، کانفرنس میں کہا گیا کہ ڈیجیٹل دہشتگردی کا مقصد جھوٹ، جعلی خبروں اور پروپیگنڈے سے قوم میں نفاق اور مایوسی پھیلانا ہے۔
شرکاء کا کہنا تھا کہ افواج پاکستان اور قوم ان سازشوں سے نہ صرف آگاہ ہیں بلکہ انہیں شکست دینے کے لیے پُرعزم اور متحد ہیں۔ کانفرنس نے ملک کی سماجی اور معاشی ترقی کے لیے کی جانے والی کوششوں میں مکمل تعاون کا اعادہ کیا اور سرمایہ کاروں کے اعتماد کی بحالی اور معاشی استحکام کے لیے حکومتی کوششوں کی مکمل حمایت کی