ایف آئی اے کی کارروائی: بیورو آف امیگریشن کے 3 افسران گرفتار

ایف آئی اے اینٹی کرپشن سرکل کی کارروائی: تین افسران گرفتار
اسلام آباد: ایف آئی اے کے اینٹی کرپشن سرکل نے بیورو آف امیگریشن اینڈ اوورسیز ایمپلائمنٹ کے تین افسران کو گرفتار کر لیا ہے جو نااہل نرسوں کو پروٹیکٹر جاری کرنے میں ملوث تھے۔

ترجمان ایف آئی اے کے مطابق گرفتار کیے گئے افسران میں ڈائریکٹر سعید خان، ڈائریکٹر گل اکبر، اور اسسٹنٹ ڈائریکٹر احمر وحید شامل ہیں۔ ان پر الزام ہے کہ انہوں نے بغیر این او سی کے نااہل نرسوں کو پروٹیکٹر جاری کیے۔

ملزمان کو اسپیشل جج سنٹرل راولپنڈی کی عدالت سے ضمانت منسوخ ہونے پر گرفتار کیا گیا۔ ترجمان نے بتایا کہ ان افسران نے مجموعی طور پر 92 نرسوں کو غیر قانونی پروٹیکٹر جاری کیے تھے، جنہیں بعد میں سعودی عرب سے ڈیپورٹ کر دیا گیا۔

افسران نے یہ غیر قانونی عمل الموارد نامی سعودی عرب کی اوورسیز ایمپلائمنٹ پروموٹر کمپنی کی ڈیمانڈ پر انجام دیا تھا۔ ایف آئی اے کے ترجمان کا کہنا ہے کہ ملزمان کو گرفتار کرنے کے بعد ان سے تفتیش کا عمل شروع کر دیا گیا ہے جس کے بعد مزید کاروائی کی جائے گی