سپریم کورٹ آئینی بنچ نے فوجی عدالتوں کو فیصلے سنانے کی اجازت دے دی

سپریم کورٹ آئینی بنچ نے فوجی عدالتوں کو فیصلے سنانے کی اجازت دے دی

اسلام آباد :سپریم کورٹ کے آئینی بینچ نے فوجی عدالتوں کو 85 ملزمان کے مقدمات پر فیصلے سنانے کی اجازت دے دی ہے۔ عدالت نے ہدایت دی ہے کہ جن ملزمان کو سزاؤں میں رعایت مل سکتی ہے، انہیں دے کر رہا کیا جائے، اور جنہیں رہائی ممکن نہ ہو، انہیں سزا دے کر جیلوں میں منتقل کیا جائے۔ سپریم کورٹ کے مطابق یہ فیصلے سپریم کورٹ میں زیرِ سماعت مقدمات کے حتمی فیصلے سے مشروط ہوں گے۔
سپریم کورٹ نے فوجی عدالتوں کے مقدمے کے علاوہ دیگر تمام سماعتیں ملتوی کر دی ہیں۔ 7 رکنی آئینی بینچ، جس کی سربراہی جسٹس امین الدین کر رہے ہیں، نے سویلنز کے خلاف فوجی عدالتوں میں مقدمات کی سماعت پر بات کی۔ بینچ نے یہ وضاحت دی کہ اس روز صرف فوجی عدالتوں کا مقدمہ ہی زیر بحث ہوگا۔
وزارتِ دفاع کے وکیل خواجہ حارث نے عدالت میں پیش ہو کر دلائل دیئے۔ جسٹس جمال مندوخیل نے ان سے استفسار کیا کہ آرمی ایکٹ کی جن دفعات کو کالعدم قرار دیا گیا ہے، کیا وہ آئین کے مطابق تھیں؟ مزید سوال کیا کہ کیا آرمی ایکٹ میں ترمیم کر کے ہر شہری کو اس کے دائرہ کار میں لایا جا سکتا ہے؟
جسٹس محمد علی مظہر نے سوال کیا کہ آرمی ایکٹ کی دفعات کالعدم قرار دینے کی وجوہات کیا ہیں؟ جسٹس جمال مندوخیل نے کہا کہ آرمی ایکٹ 1973 کا آئین سے پہلے کا قانون ہے، اس پہلو کو بھی دیکھا جائے۔
وزارت دفاع کے وکیل نے دلائل میں کہا کہ سپریم کورٹ کے فیصلے میں غلطیاں ہیں۔ اس پر جسٹس جمال مندوخیل نے ریمارکس دیے کہ عدالتی فیصلوں کو خراب کہنا مناسب نہیں۔ وکیل نے معذرت کرتے ہوئے کہا کہ ان کے الفاظ قانونی نوعیت کے نہیں تھے۔
جسٹس محمد علی مظہر نے کہا کہ کل بھی کہا تھا کہ 9 مئی کے واقعات کی تفصیلات فراہم کی جائیں، ابھی تک صرف کور کمانڈر ہاؤس کا مقدمہ سامنے آیا ہے۔ ایڈیشنل اٹارنی جنرل نے کہا کہ تفصیلات صبح موصول ہوئیں اور انہیں متفرق درخواست کی صورت میں پیش کریں گے۔
جسٹس مسرت ہلالی نے سوال اٹھایا کہ کالعدم قرار دی گئی دفعات کے تحت کیے گئے ٹرائلز کا کیا ہوگا؟ خواجہ حارث نے وضاحت کی کہ عمومی طور پر ایسے فیصلوں کو تحفظ دیا جاتا ہے۔ تاہم جسٹس مسرت ہلالی نے کہا کہ یہ تعصب والی بات ہوگی۔
جسٹس جمال مندوخیل نے ریمارکس دیے کہ فوج جوائن کرنے والا شخص جانتا ہے کہ اس پر آرمی ایکٹ کا اطلاق ہوگا اور فوج میں بنیادی حقوق محدود ہوتے ہیں۔ وزارت دفاع کے وکیل نے کہا کہ فوج میں جرم کی نیت سے کوئی کام نہیں کیا جاتا۔