کراچی: جدہ ایئرپورٹ پر پی آئی اے کے طیارے میں انجن نمبر 2 میں آگ لگنے کی اطلاع پر مسافروں کا ہنگامی انخلا کیا گیا، تاہم پی آئی اے ترجمان نے طیارے میں آگ لگنے کی تردید کردی۔

کراچی: جدہ ایئرپورٹ پر پی آئی اے کے طیارے میں انجن نمبر 2 میں آگ لگنے کی اطلاع پر مسافروں کا ہنگامی انخلا کیا گیا، تاہم پی آئی اے ترجمان نے طیارے میں آگ لگنے کی تردید کردی۔

ذرائع کے مطابق کراچی سے جدہ پہنچنے والا ایئربس طیارہ جدہ ایئرپورٹ کے پارکنگ اسٹینڈ پر موجود تھا کہ گراؤنڈ اسٹاف نے انجن میں آگ لگنے کا شبہ ظاہر کیا۔ اطلاع ملنے پر پائلٹ نے ایس او پیز کے تحت مسافروں کے ہنگامی انخلا کا عمل شروع کیا۔

ذرائع کا کہنا ہے کہ مسافروں کو ایمرجنسی اخراج کے راستوں اور سلائیڈز کے ذریعے طیارے سے بحفاظت باہر نکالا گیا۔ اس دوران بعض مسافروں کو معمولی چوٹیں آنے کی اطلاعات ہیں، جنہیں طبی معائنے اور علاج کے لیے جدہ ایئرپورٹ کے کلینک منتقل کیا گیا۔

واقعے کی اطلاع ملتے ہی جدہ ایئرپورٹ کے فائر شعبے کے حکام فائر بریگیڈ کے ہمراہ طیارے کے قریب پہنچ گئے۔ پی آئی اے جدہ حکام نے ایئرپورٹ انتظامیہ اور سکیورٹی حکام کو بھی صورتحال سے آگاہ کیا۔

پی آئی اے ترجمان کا مؤقف

دوسری جانب پی آئی اے ترجمان نے طیارے میں آگ لگنے کی تردید کرتے ہوئے کہا کہ طیارے نے جدہ ایئرپورٹ پر معمول کے مطابق لینڈنگ کی اور جیٹی پر لگنے کے دوران گراؤنڈ اسٹاف نے ایک انجن میں آگ کا شبہ ظاہر کیا۔

ترجمان کے مطابق پائلٹ نے ایس او پیز کے تحت مسافروں کو طیارے سے باہر نکالنے کے لیے ایمرجنسی سلائیڈز کھولیں۔ کچھ مسافر جیٹی کے ذریعے جبکہ باقی ایمرجنسی سلائیڈز کے ذریعے طیارے سے باہر آئے۔

پی آئی اے ترجمان نے کہا کہ کارروائی کے دوران کوئی مسافر زخمی نہیں ہوا اور تمام مسافر محفوظ ہیں۔ طیارے کی تفصیلی جانچ پڑتال کے بعد آگ لگنے کا شبہ غلط ثابت ہوا۔

ترجمان کے مطابق متاثرہ طیارے کی جدہ سے لاہور پرواز 20 سے 22 گھنٹے تاخیر کا شکار ہوگئی، جبکہ پرواز کے 40 مسافروں کو ہوٹل منتقل کردیا گیا اور باقی مسافر اپنے گھروں کو روانہ ہوگئے۔