بلاول بھٹو کا ہائی پاور سلیکشن بورڈ میں شمولیت کا مطالبہ

بلاول بھٹو کا ہائی پاور سلیکشن بورڈ میں شمولیت کا مطالبہ

اسلام آباد:پیپلز پارٹی کے چیئرمین بلاول بھٹو زرداری نے وزیراعظم شہباز شریف سے درخواست کی ہے کہ انہیں ہائی پاور سلیکشن بورڈ (ایچ پی ایس بی) کا حصہ بنایا جائے تاکہ وہ اعلیٰ افسران کی گریڈ 21 سے 22 میں ترقی کے عمل میں شامل ہو سکیں۔

بلاول بھٹو کی اس درخواست کے باعث ہائی پاور سلیکشن بورڈ کا پیر اور منگل کو ہونے والا اجلاس ملتوی کر دیا گیا ہے، جسے اب جنوری میں منعقد کیا جائے گا۔

ذرائع کے مطابق بلاول بھٹو نے کہا ہے کہ وہ افسران کی ترقی کے اہم عمل میں وزیراعظم کے ساتھ شامل ہونا چاہتے ہیں۔ ان کی درخواست پر حتمی فیصلہ وزیراعظم کریں گے۔

پچھلا اجلاس ہائی پاور سلیکشن بورڈ کا آخری اجلاس فروری 2023 میں ہوا تھا

ذرائع کے مطابق سینٹرل سلیکشن بورڈ میں گریڈ 20 اور 21 کے افسران کی ترقی کے لیے وزرائے اعلیٰ کو شامل کرنے کی تجویز دی گئی تھی، لیکن وزیراعظم نے یہ تجویز مسترد کر دی۔ اس کے بجائے سینیٹر سلیم مانڈوی والا کو سینٹرل سلیکشن بورڈ میں شامل کر لیا گیا ہے۔

یہ بات قابل ذکر ہے کہ ماضی میں نوید قمر سمیت دیگر سیاسی شخصیات بھی سلیکشن بورڈ کا حصہ رہ چکی ہیں۔