کراچی کے عوام کیلئے بجلی 3 روپے 9 پیسے فی یونٹ مہنگی ہونے کا امکان
کراچی: کے الیکٹرک نے بجلی کی قیمت میں مزید اضافے کے لیے نیشنل الیکٹرک پاور ریگولیٹری اتھارٹی (نیپرا) میں درخواست جمع کرادی ہے۔ یہ درخواست جولائی کی فیول پرائس ایڈجسٹمنٹ کے تحت کی گئی ہے، جس میں بجلی کی قیمت میں 3 روپے 9 پیسے فی یونٹ اضافے کی درخواست کی گئی ہے۔ نیپرا اتھارٹی 29 اگست کو اس درخواست پر سماعت کرے گی۔کے الیکٹرک کی اس درخواست کی منظوری کی صورت میں کراچی کے صارفین پر 6 ارب 20 کروڑ 60 لاکھ روپے کا اضافی بوجھ پڑے گا۔
یہ بوجھ اس فیول ایڈجسٹمنٹ کی مد میں صارفین کو ادا کرنا ہوگا۔یاد رہے کہ نیپرا نے حال ہی میں مئی اور جون کی ایڈجسٹمنٹ کے تحت بھی کے الیکٹرک کی درخواست پر بجلی کی قیمت میں 5 روپے 76 پیسے فی یونٹ اضافہ کیا تھا۔ نیپرا کی جانب سے جاری کردہ نوٹیفکیشن کے مطابق، کراچی کے صارفین کے لیے بجلی کی قیمت میں دو ماہانہ ایڈجسٹمنٹ کے تحت یہ اضافہ کیا گیا ہے۔کے الیکٹرک کے ترجمان کا کہنا ہے کہ بجلی کی قیمت میں یہ اضافہ عالمی منڈی میں ایندھن کی قیمتوں میں اضافے اور مقامی سطح پر بڑھتے ہوئے اخراجات کے سبب کیا جا رہا ہے۔ انہوں نے مزید کہا کہ ایندھن کی قیمتوں میں یہ اتار چڑھاؤ براہ راست صارفین کے بلوں پر اثرانداز ہوتا ہے، جسے فیول پرائس ایڈجسٹمنٹ کے تحت صارفین تک منتقل کیا جاتا ہے۔
