حملہ آور کی اڈیالہ جیل میں داخل ہونے کی کوشش ناکام، کانسٹیبل زخمی
راولپنڈی: حساس اڈیالہ جیل میں گھسنے کی کوشش کرنے والے شخص کے خلاف مقدمہ درج کرلیا گیا ہے۔تھانہ صدر بیرونی میں اڈیالہ چوکی کے انچارج آفتاب احمد کی مدعیت میں مقدمہ درج کیا گیا ہے۔
ملزم نے سیکورٹی اہلکاروں کو جان سے مارنے کی نیت سے گاڑی سے کچلنے کی کوشش کی، جس سے کانسٹیبل فہد زخمی ہو گیا اور بمشکل اپنی جان بچا سکا۔
گاڑی کی ٹکر سے جیل کا گیٹ ٹوٹ گیا اور کنڈا کھلنے پر ملزم نے جیل کے اندر داخل ہونے کی کوشش کی۔ تاہم، پولیس، ایلیٹ فورس اور جیل سیکورٹی نے فوری کارروائی کرتے ہوئے ملزم کو گرفتار کرلیا۔ ملزم کی شناخت مبشر حسین کے نام سے ہوئی ہے اور اس کا تعلق سمندری سے ہے۔
واضح رہے کہ بانی پی ٹی آئی اڈیالہ جیل میں قید ہیں اور جیل کی سکیورٹی بھی انتہائی سخت ہے۔
