پی ٹی آئی پر پابندی سے نواز شریف اور زرداری کو نقصان ہوگا: فواد چوہدری
لاہور: سابق وفاقی وزیر فواد چوہدری نے کہا ہے کہ پاکستان تحریک انصاف (پی ٹی آئی) پر پابندی عائد کرنے کا فیصلہ نواز شریف اور آصف زرداری کی جانب سے تاریخ کی سب سے بڑی غلطی ہوگی۔
لاہور میں میڈیا سے گفتگو کرتے ہوئے فواد چوہدری نے انسداد دہشتگردی عدالت کے جج پر عدم اعتماد کا اظہار کیا اور کہا کہ دنیا پاکستان میں انسانی حقوق کی خلاف ورزیاں دیکھ رہی ہے۔
فواد چوہدری نے بانی پی ٹی آئی کی گرفتاری کا ذکر کرتے ہوئے کہا کہ بانی پی ٹی آئی کو 14 ماہ سے جیل میں رکھا ہوا ہے، لیکن اس سے کوئی فرق نہیں پڑا۔ انہوں نے کہا کہ بلا نشان چھینا گیا اور مختلف نشانات دیے گئے، مگر عوام نے پھر بھی ووٹ دیے۔
انہوں نے دعویٰ کیا کہ پی ٹی آئی ڈیجیٹل دہشتگردی میں ملوث نہیں ہے، بلکہ یہ سرگرمیاں بیرون ملک سے ہو رہی ہیں۔
فواد چوہدری نے کہا کہ کابینہ کی میٹنگ میں پی ٹی آئی پر پابندی کا کام آج کیا جا رہا ہے، اور نواز شریف اور آصف زرداری اس فیصلے کے بعد پوری دنیا میں کسی کو منہ دکھانے کے قابل نہیں ہوں گے۔
انہوں نے مزید کہا کہ آپ نہ سپریم کورٹ کو مان رہے ہیں اور نہ ہی کسی قانون کو۔ رؤف حسن اور احمد کی فوری رہائی کا مطالبہ کرتے ہوئے، انہوں نے کہا کہ عدالت، عوام اور معیشت کے ساتھ لڑائی جاری ہے اور ابھی شروعات ہیں، مگر آنے والے دنوں میں لوگ چیخیں گے۔
فواد چوہدری نے یہ بھی کہا کہ کالعدم تحریک طالبان پاکستان (ٹی ٹی پی) سمیت دیگر جماعتوں کی کسی صورت حوصلہ افزائی نہیں ہونی چاہیے۔
