حکومت کا کچے میں شہید پولیس اہلکاروں کے خون کا بدلہ لینے کا فیصلہ
رحیم یار خان:وفاقی وزیر داخلہ محسن نقوی کی صدارت میں رحیم یار خان ایئرپورٹ پر ایک اہم اجلاس ہوا جس میں کچے کے علاقے میں موجود شرپسندوں کے خلاف مربوط اور مؤثر آپریشن کرنے کا حکم دیا گیا۔ وزیر داخلہ نے واضح کیا کہ شرپسندوں کے ساتھ سختی سے نمٹا جائے گا، اور حملہ آوروں سے اپنے بہادر جوانوں کے خون کا بدلہ لینے کے لئے ہر ممکن اقدام اٹھایا جائے گا۔ اس اجلاس میں محسن نقوی کو کچے کے علاقے میں پیش آئے افسوسناک واقعے کے بارے میں تفصیلی بریفنگ دی گئی، جس میں پنجاب پولیس، پنجاب رینجرز اور سندھ پولیس کے افسران شامل تھے۔
وزیر داخلہ نے فورسز کو جدید ہتھیاروں اور حفاظتی آلات سے لیس کرنے کی ہدایات جاری کیں تاکہ آئندہ ایسے واقعات کو روکا جا سکے۔ بعد ازاں، وزیر داخلہ محسن نقوی نے شیخ زاید اسپتال رحیم یار خان میں زخمی پولیس اہلکاروں کی عیادت کی اور ان کے بلند حوصلے کی تعریف کی۔ انہوں نے کہا کہ شہید پولیس اہلکاروں کو تمغہ شجاعت سے نوازنے کی سفارش کی گئی ہے، اور مزید کہا کہ حملہ آوروں کو عبرتناک انجام تک پہنچایا جائے گا۔ وفاقی حکومت ہر ممکن تعاون فراہم کر رہی ہے اور آئندہ بھی کرتی رہے گی۔
