دو ماہ کی بارشوں اور سیلاب سے 245 افراد جانبحق، سب سے زیادہ اموات پنجاب میں

دو ماہ کی بارشوں اور سیلاب سے 245 افراد جانبحق، سب سے زیادہ اموات پنجاب میں

اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں بارشوں اور سیلاب کی تباہ کاریوں کی رپورٹ جاری کردی ہے۔ رپورٹ کے مطابق یکم جولائی سے 27 اگست تک ہونے والی بارشوں اور سیلابی صورتحال سے ملک بھر میں مجموعی طور پر 245 افراد جاں بحق ہوئے۔ سب سے زیادہ جانی نقصان پنجاب میں ہوا، جہاں 92 افراد اپنی جان سے ہاتھ دھو بیٹھے۔

رپورٹ میں بتایا گیا ہے کہ خیبرپختونخوا میں 74، سندھ میں 47، بلوچستان میں 22، کشمیر میں 6 اور گلگت بلتستان میں 4 افراد جانبحق ہوئے۔ جاں بحق ہونے والوں میں 121 بچے اور 48 خواتین بھی شامل ہیں۔

این ڈی ایم اے کی رپورٹ کے مطابق بارشوں اور سیلاب کے دوران پیش آنے والے مختلف حادثات میں 446 افراد زخمی ہوئے، جن میں 158 مرد، 107 خواتین اور 181 بچے شامل ہیں۔ بارشوں اور سیلابی ریلوں نے 1002 مکانات کو مکمل طور پر تباہ کر دیا جبکہ 3475 مکانات کو جزوی نقصان پہنچا۔ اس کے علاوہ 8 اسکولوں، 35 پلوں اور ریلوے ٹریکس کو بھی نقصان پہنچا۔

بارشوں سے 609 مویشی بھی ہلاک ہوگئے جبکہ سبی سے ہرنائی سیکشن کے ٹریک کو بھی نقصان پہنچا جس کی بحالی کا کام جاری ہے اور اس کی تکمیل 10 ستمبر تک متوقع ہے۔ کول پر اور ڈوزان کے درمیان ریلوے پل کو بھی شدید بارشوں نے نقصان پہنچایا، جس کی مرمت کا کام جاری ہے۔

رپورٹ کے مطابق سیلابی صورتحال اور بارشوں کی تباہ کاریوں سے نمٹنے کے لئے حکومتی ادارے متحرک ہیں، لیکن عوام کو بروقت امداد کی فراہمی اور بحالی کے عمل میں مشکلات کا سامنا ہے۔ این ڈی ایم اے نے عوام سے اپیل کی ہے کہ وہ احتیاطی تدابیر اختیار کریں اور متعلقہ حکام کے ساتھ تعاون کریں تاکہ جانی و مالی نقصان سے بچا جا سکے