بجٹ پر بانی پی ٹی آئی نے کیاکہا۔۔؟

راولپنڈی (نمائندہ جنگ) بانی پاکستان تحریک انصاف (پی ٹی آئی) نے مالی سال 2025-26 کے وفاقی بجٹ پر شدید تحفظات کا اظہار کیا ہے۔ ان کی ہمشیرہ علیمہ خان نے اڈیالہ جیل کے باہر میڈیا سے گفتگو میں بتایا کہ بانی پی ٹی آئی کا کہنا ہے کہ ’’یہ بجٹ بھی دو طبقوں  تنخواہ دار اور کسان  پر سارا بوجھ ڈال دے گا، جو پہلے ہی معاشی دباؤ میں ہیں۔‘‘

علیمہ خان نے مزید بتایا کہ بانی پی ٹی آئی نے کہا ہے کہ خیبر پختونخوا کا بجٹ ٹیکس فری ہوگا، اور انہوں نے علی امین گنڈاپور کو ہدایت کی ہے کہ پارٹی کی معاشی ٹیم کو بجٹ پر مشاورت کی اجازت دی جائے۔ ان کا کہنا تھا کہ بانی پی ٹی آئی کا مؤقف ہے کہ موجودہ معاشی پالیسیوں سے عام آدمی کو ریلیف نہیں بلکہ مزید مشکلات کا سامنا کرنا پڑے گا، اور حکومت کو چاہیے کہ بجٹ سازی میں تمام اسٹیک ہولڈرز کو اعتماد میں لے۔