محرم الحرام میں سبیلوں کے سخت ضابطے جاری: پنجاب حکومت کا عوامی تحفظ کے لیے بڑا اقدام

لاہور (ایم وائے کے نیوز ٹی وی): محرم الحرام کی آمد کے پیش نظر حکومتِ پنجاب نے سبیلوں کے قیام و انتظام سے متعلق ایک جامع ضابطہ اخلاق جاری کر دیا ہے، جس کا مقصد عوام کی صحت، سیکیورٹی اور نظم و ضبط کو یقینی بنانا ہے۔ وزیراعلیٰ پنجاب کی خصوصی ہدایات پر صوبہ بھر میں ضلعی انتظامیہ سبیلوں کے قیام کی نگران ہوگی، جبکہ قواعد کی خلاف ورزی پر سخت قانونی کارروائی کی جائے گی۔

محکمہ داخلہ پنجاب کی جانب سے جاری کردہ مراسلے کے مطابق یکم محرم سے 10 محرم تک خصوصی انتظامات کیے جائیں گے، خصوصاً 9 اور 10 محرم کو عوامی سہولت کے لیے سبیلوں کا وسیع پیمانے پر اہتمام ہوگا۔ تمام اضلاع میں سبیلیں حفظانِ صحت کے اصولوں، سیکیورٹی اور یکسانیت کے ساتھ لگائی جائیں گی۔ مشروبات اور دیگر اشیاء کی جانچ رجسٹرڈ میڈیکل پریکٹیشنرز اور فوڈ سیفٹی آفیسرز سے کروانا لازمی قرار دیا گیا ہے، تاکہ کسی قسم کی غیر معیاری یا مضر صحت اشیاء عوام کو فراہم نہ کی جا سکیں۔

محکمہ داخلہ نے واضح کیا ہے کہ تمام سبیلیں مخصوص سائز (10×8 فٹ) کی ہوں گی اور فٹ پاتھ پر جگہ چھوڑ کر بنائی جائیں گی تاکہ پیدل چلنے والوں کو کسی قسم کی دشواری کا سامنا نہ ہو۔ سبیلوں پر موجود پانی، دودھ یا شربت کے کنٹینر پر واضح لیبل موجود ہونا چاہیے، اور صرف ڈسپوزایبل کپ استعمال کیے جائیں گے۔ تمام سبیلوں پر دھوپ سے بچاؤ کے لیے چھاتے یا سایہ دار انتظامات بھی لازمی ہوں گے۔

محکمہ داخلہ پنجاب نے سیکیورٹی کو اولین ترجیح دیتے ہوئے کہا ہے کہ سبیلوں پر تعینات رضاکاروں کی اسپیشل برانچ سے کلیئرنس کروائی جائے گی، جبکہ حساس مقامات پر بم ڈسپوزل اسکواڈ سے پیشگی سویپنگ بھی لازمی ہوگی۔ رضاکاروں کو شناختی کارڈ کے ساتھ سرکاری اجازت نامے پہننے کی ہدایت کی گئی ہے، اور حساس مقامات پر لگائی جانے والی سبیلیں سی سی ٹی وی کیمروں کی نگرانی میں ہونی چاہئیں۔ محکمہ داخلہ نے ہدایت کی ہے کہ سبیلوں کے اردگرد منظم قطاریں بنائی جائیں، کسی بھی مقام پر غیر مجاز ریہڑی، گاڑی یا ہجوم کی اجازت نہیں دی جائے گی۔ فرقہ وارانہ نعرے، سیاسی بینرز، لاؤڈ اسپیکر، چندہ جمع کرنے یا تجارتی اشتہارات پر مکمل پابندی عائد کی گئی ہے۔

صفائی کے حوالے سے بھی سخت ہدایات جاری کی گئی ہیں، جن میں روزانہ کی بنیاد پر صفائی، رضاکاروں کو دستانے اور فیس ماسک پہننے کی ہدایت اور ہر سبیل پر ڈھکے ہوئے کچرا دان کی موجودگی کو یقینی بنانا شامل ہے۔ ضلعی انتظامیہ کو کہا گیا ہے کہ وہ یکم تا 10 محرم روزانہ سبیلوں کا معائنہ کریں، اور کسی بھی خلاف ورزی کی صورت میں فوری کارروائی کی جائے۔ یہ ہدایات محض ایک ضابطہ نہیں بلکہ ایک مکمل حکمتِ عملی ہے جس کا مقصد محرم الحرام کے ایام میں عوام کو محفوظ، صحت مند اور پرامن ماحول فراہم کرنا ہے۔ اس اقدام کو مختلف سماجی، مذہبی اور شہری حلقوں نے سراہا ہے اور امید ظاہر کی ہے کہ اس سال سبیلوں کا نظام پہلے سے زیادہ منظم اور محفوظ ہوگا۔