صنم جاوید کو بڑا ریلیف، لاہور ہائیکورٹ نے ریاست مخالف مقدمے میں ضمانت منظور کر لی

لاہور (ایم وائے کے نیوز ٹی وی) : پاکستان تحریک انصاف کی سرگرم کارکن صنم جاوید کو بالآخر لاہور ہائیکورٹ سے بڑا ریلیف مل گیا ہے۔ ریاست مخالف مواد اپ لوڈ کرنے کے مقدمے میں لاہور ہائیکورٹ نے ان کی بعد از گرفتاری ضمانت منظور کرتے ہوئے 5 لاکھ روپے کے مچلکوں کے عوض فوری رہائی کا حکم دے دیا ہے۔

جسٹس فاروق حیدر نے صنم جاوید کی درخواست ضمانت پر سماعت کی۔ دورانِ سماعت پی ٹی آئی رہنما کی جانب سے میاں علی اشفاق ایڈووکیٹ عدالت میں پیش ہوئے اور مؤقف اپنایا کہ صنم جاوید کے خلاف الزامات بے بنیاد ہیں، انہوں نے کوئی ریاست مخالف بات نہیں کی بلکہ محض سیاسی وابستگی کی بنیاد پر نشانہ بنایا گیا ہے۔ دوسری جانب ایف آئی اے نے عدالت میں صنم جاوید کی ضمانت کی سخت مخالفت کی اور مؤقف اختیار کیا کہ ان کے خلاف مقدمہ قانون کے مطابق درج کیا گیا ہے اور وہ ریاست مخالف مواد پھیلانے میں ملوث رہی ہیں۔ تاہم عدالت نے دونوں جانب سے دلائل سننے کے بعد 5 لاکھ روپے کے ضمانتی مچلکوں کے عوض ضمانت منظور کرتے ہوئے ان کی رہائی کا حکم دے دیا۔

واضح رہے کہ صنم جاوید کا شمار ان پی ٹی آئی کارکنان میں ہوتا ہے جو گزشتہ کچھ عرصے میں پارٹی سرگرمیوں میں نمایاں طور پر متحرک رہیں، اور متعدد مرتبہ مختلف مقدمات کی زد میں آ چکی ہیں۔ ان کی گرفتاری اور مقدمات کو سیاسی انتقام قرار دیتے ہوئے پی ٹی آئی کی جانب سے شدید مذمت کی جاتی رہی ہے۔