لاہور میں کتنی پلاسٹک کی بوتلیں جمع کراوانے پر کتنے روپے ملیں گے ؟ پنجاب حکومت کا نیا معاہدہ طے

لاہور (ایم وائے کے نیوز ٹی وی) لاہور میں ماحولیاتی آلودگی کے خلاف جنگ میں ایک نئی اور انقلابی پیش رفت سامنے آئی ہے۔ پنجاب حکومت نے وزیراعلیٰ گرین کریڈٹس پروگرام کے تحت ایک نجی کمپنی کے ساتھ سنگل یوز پلاسٹک کو ری سائیکل کرنے کا معاہدہ طے کر لیا ہے، جس کے بعد شہری پلاسٹک کی بوتلیں جمع کرا کر فوری نقد رقم حاصل کر سکیں گے۔ اس جدید اور ماحول دوست منصوبے کا باضابطہ آغاز آئندہ ماہ سے ہو گا۔

اس منصوبے کے تحت چینی ٹیکنالوجی سے تیار کردہ جدید مشینیں لاہور کی چار بڑی جامعات میں نصب کی جائیں گی، جب کہ آئندہ مرحلے میں انہیں شہر کی اہم مارکیٹوں اور بازاروں میں بھی لگایا جائے گا۔ ان مشینوں کی خاص بات یہ ہے کہ یہ نہ صرف بوتلیں وصول کرتی ہیں بلکہ صارفین کو نقد رقم کی سہولت بھی فراہم کرتی ہیں۔

مشین کا استعمال بھی نہایت آسان ہے۔ صارف کو پہلے بٹن ’اے‘ دبانا ہوگا، پھر پلاسٹک کی بوتل مشین میں ڈالنی ہے۔ اس کے بعد اپنا فون نمبر درج کر کے بٹن ’بی‘ دبانے پر اسکرین پر ’گرین کریڈٹس‘ ظاہر ہوں گے۔ یہ کریڈٹس مخصوص ایپ کے ذریعے مانیٹر کیے جا سکیں گے اور ان کے بدلے میں فوری رقم وصول کی جا سکتی ہے۔

نجی کمپنی کے چیئرمین گلفام عابد نے بتایا کہ لاہور میں روزانہ تقریباً 500 ٹن پلاسٹک کی بوتلوں کا کچرا پیدا ہوتا ہے، جسے یہ مشینیں ری سائیکل کریں گی۔ ان بوتلوں سے فٹ پاتھ، سڑکوں کی مرمت (پیچ ورک)، اور ماحول دوست اینٹیں تیار کی جائیں گی۔ انہوں نے واضح کیا کہ ڈیڑھ لیٹر کی 20 یا ہاف لیٹر کی 40 بوتلیں مشین میں ڈالنے پر شہریوں کو فوری طور پر 1000 روپے کیش دیا جائے گا۔

یہ پروگرام صرف عام شہریوں تک محدود نہیں بلکہ لاہور کے تقریباً 18 ہزار رجسٹرڈ کباڑیے بھی اس سے استفادہ کر سکیں گے۔ وہ موبائل ایپ کے ذریعے کمپنی سے رابطہ کریں گے اور مقررہ نمائندہ ان کے گھر یا دکان پر آ کر نقد رقم کے عوض پلاسٹک کی بوتلیں حاصل کرے گا۔