لاہور ہائیکورٹ کے جسٹس راحیل کامران شیخ نے استعفے سے قبل اپنا آخری فیصلہ جاری کردیا، فیصلہ سگریٹ، پان اور تمباکو کی تشہیر سے متعلق ہے۔
عدالتی فیصلے میں تمباکو اور پان کی تشہیر کو غیر قانونی قرار دیا گیا، جبکہ وفاقی حکومت کی جانب سے تشہیر پر پابندی سے متعلق نوٹیفکیشن کو بھی درست قرار دیتے ہوئے درخواست خارج کردی گئی۔
فیصلے میں کہا گیا ہے کہ حکومت کے مطابق تمباکو، سگریٹ اور پان کی تشہیر کے منفی نتائج سامنے آئیں گے۔ عوامی صحت کا تحفظ اور صحت مند ماحول کا قیام آئینی تقاضا ہے، جبکہ تمباکو مصنوعات کی تشہیر کا کوئی مستقل آئینی حق موجود نہیں۔
عدالت نے قرار دیا کہ اشتہارات پر پابندی سے غیر قانونی تجارت کا کوئی خدشہ نہیں۔ لاہور ہائیکورٹ نے مشترکہ مفادات کونسل سے رجوع نہ کرنے کا آئینی اعتراض بھی مسترد کردیا۔
عدالتی فیصلے میں کہا گیا کہ حکومتی نوٹیفکیشن میں کوئی غیر قانونی چیز نہیں پائی گئی، تاہم ہر شہری کو کاروبار اور تجارت کرنے کا آئینی حق حاصل ہے۔
لاہور ہائیکورٹ نے تمباکو کی تشہیر پر پابندی سے متعلق حکومتی نوٹیفکیشن کو درست قرار دیتے ہوئے درخواست خارج کردی۔
