یوٹیوب سے کمائی مزید مشکل، پارٹنر پروگرام کی شرائط سخت کرنے کا فیصلہ
دنیا بھر میں اضافی آمدنی کے لیے یوٹیوب استعمال کرنے والے افراد کے لیے بری خبر ہے کہ پلیٹ فارم نے مونیٹائزیشن کی شرائط مزید سخت کرنے کا فیصلہ کرلیا۔
یوٹیوب پارٹنر پروگرام (YPP) کے ذریعے صارفین اشتہارات، چینل ممبرشپ، سپر چیٹ اور دیگر ذرائع سے آمدنی حاصل کرتے ہیں، تاہم اب اس پروگرام میں شامل ہونا پہلے کے مقابلے میں زیادہ مشکل ہوگا۔
رپورٹ کے مطابق پہلے یوٹیوب سے کمائی کے لیے چینل پر کم از کم 1 ہزار سبسکرائبرز اور گزشتہ 12 ماہ کے دوران طویل ویڈیوز کے 4 ہزار گھنٹے واچ ٹائم کی شرط تھی۔
نئی شرائط کے تحت طویل ویڈیوز سے مونیٹائزیشن کے لیے گزشتہ ایک سال میں کم از کم 8 ہزار گھنٹے واچ ٹائم درکار ہوگا۔
اسی طرح یوٹیوب شارٹس کے ذریعے آمدنی کے لیے گزشتہ 90 دن میں ویڈیوز پر 2 کروڑ سے زائد ویوز حاصل کرنا ہوں گے، جبکہ اس سے قبل یہ حد ایک کروڑ ویوز تھی۔
رپورٹ کے مطابق نئی تبدیلیوں کا اطلاق یکم فروری 2027 سے ہوگا اور پہلے سے یوٹیوب پارٹنر پروگرام کا حصہ بننے والے صارفین اس تبدیلی سے متاثر نہیں ہوں گے۔
یوٹیوب کے مطابق مستقبل میں شارٹس سے آمدنی جاری رکھنے کے لیے صارفین کو ہر 90 دن میں ایک کروڑ ویوز کی شرط برقرار رکھنا ہوگی۔ شرط پوری نہ ہونے کی صورت میں صارف پارٹنر پروگرام میں شامل تو رہے گا، تاہم شارٹس سے آمدنی کا فیچر اس وقت تک دستیاب نہیں ہوگا جب تک مطلوبہ ویوز دوبارہ حاصل نہ کرلیے جائیں۔
کمپنی کا کہنا ہے کہ ان تبدیلیوں کا مقصد پلیٹ فارم کی تیز رفتار ترقی کے ساتھ معیار اور پائیداری کو برقرار رکھنا ہے۔ یوٹیوب کے مطابق پلیٹ فارم پر روزانہ 200 ارب سے زائد شارٹس ویوز ریکارڈ کیے جاتے ہیں، جبکہ صرف ٹی وی اسکرینز پر روزانہ تقریباً ایک ارب گھنٹے کی ویڈیوز دیکھی جاتی ہیں۔
نئی شرائط کے باعث خاص طور پر شارٹس بنانے والے نئے کریئیٹرز کے لیے یوٹیوب پارٹنر پروگرام میں داخل ہونا اور مونیٹائزیشن برقرار رکھنا پہلے سے زیادہ مشکل ہوسکتا ہے۔
