قائداعظم کی بصیرت افروز قیادت اور سیاسی حکمت عملی کو قوم خراجِ عقیدت پیش کرتی ہے: وزیراعظم
وزیراعظم شہباز شریف نے کہا ہے کہ عظیم رہبر قائداعظم محمد علی جناح کی بصیرت افروز قیادت اور باشعور سیاسی حکمت عملی کو پوری قوم خراجِ عقیدت پیش کرتی ہے۔ قائداعظم نے تاریخ کا دھارا موڑ کر برصغیر کے مسلمانوں کے لیے آزاد مملکت کی راہ ہموار کی اور مذہبی، تہذیبی و نظریاتی شناخت کے تحفظ کے لیے متحد ہو کر جدوجہد کا عزم و حوصلہ دیا۔
وزیراعظم نے کہا کہ قائداعظم نے نوزائیدہ مملکت کو درپیش کٹھن انتظامی اور مالیاتی مسائل کو مدبرانہ انداز میں سنبھالا۔ انہوں نے لاکھوں افراد کی نقل مکانی، نظامِ حکومت چلانے سمیت تمام چیلنجز کا سامنا کیا۔ پاکستان کو ترقی یافتہ اور فلاحی ریاست بنانا قائداعظم کی سیاسی میراث کا اولین مقصد ہے۔
انہوں نے مزید کہا کہ پاکستان کی ترقی، خوشحالی اور فلاح و بہبود پوری قوم کی مشترکہ و اجتماعی کاوشوں سے ممکن ہے۔ آج کا دن اس بات کا متقاضی ہے کہ ہم بحیثیت قوم قائداعظم کے رہنما اصولوں پر کاربند رہنے کے عزم کی تجدید کریں۔
وزیراعظم شہباز شریف کا کہنا تھا کہ قائد کے اصولوں، ایمان، اتحاد اور نظم و ضبط سے غیرمتزلزل وابستگی تابناک مستقبل کے لیے مشعلِ راہ ہے۔ آج پوری قوم بانیٔ پاکستان قائداعظم محمد علی جناح کے بلندیٔ درجات کے لیے دعاگو ہے۔
