پیٹرولیم لیوی کی ریکارڈ وصولی، قومی خزانے میں 1567 ارب 45 کروڑ روپے جمع
مالی سال 2025-26 میں پیٹرولیم لیوی کی مد میں حکومت نے ریکارڈ 1567 ارب 45 کروڑ روپے وصول کیے، جو مقررہ حکومتی ہدف سے تقریباً 100 ارب روپے زیادہ ہے۔
نجی ٹی وی کی رپورٹ کے مطابق مالی سال 2025-26 میں پیٹرولیم لیوی سے حاصل ہونے والی رقم حکومت کے 1468 ارب روپے کے ہدف اور آئی ایم ایف کے 1546 ارب روپے کے تخمینے سے بھی زیادہ رہی۔
رپورٹ کے مطابق کلائمیٹ سپورٹ لیوی کی مد میں بھی مزید 50 ارب 16 کروڑ روپے قومی خزانے میں جمع کیے گئے۔
گزشتہ مالی سال کے مقابلے میں پیٹرولیم لیوی کی وصولی میں 347 ارب 24 کروڑ روپے کا نمایاں اضافہ ہوا۔ مالی سال 2024-25 میں 1220 ارب 21 کروڑ، 2023-24 میں 1019 ارب جبکہ 2022-23 میں 580 ارب روپے پیٹرولیم لیوی کی مد میں وصول کیے گئے تھے۔
موجودہ ٹیکس ڈھانچے کے تحت پیٹرول پر 80 روپے فی لیٹر جبکہ ہائی اسپیڈ ڈیزل پر 77 روپے 28 پیسے فی لیٹر پیٹرولیم لیوی عائد ہے۔
اس کے علاوہ پیٹرول اور ڈیزل دونوں پر 5، 5 روپے فی لیٹر کے حساب سے کلائمیٹ سپورٹ لیوی بھی وصول کی جارہی ہے۔
