اب دھواں چھوڑنے والی گاڑیوں کے ڈرائیورز کے ڈرائیونگ لائسنس معطل ہونگے

سموگ اور فضائی آلودگی کے خاتمے کے لیے لاہور ٹریفک پولیس نے کارروائیاں مزید سخت کرنے کا فیصلہ کر لیا۔ دھواں چھوڑنے والی گاڑیوں کے ڈرائیورز کے ڈرائیونگ لائسنس معطل کیے جائیں گے، جبکہ کمرشل گاڑیوں کے روٹ پرمٹ بھی معطل ہوں گے۔

چیف ٹریفک آفیسر لاہور سید عبدالرحیم شیرازی کے مطابق رواں ماہ دھواں چھوڑنے اور فضائی آلودگی کا باعث بننے والی 34 گاڑیوں کے ڈرائیورز کے ڈرائیونگ لائسنس معطل کیے جا چکے ہیں۔

سی ٹی او لاہور کے مطابق بغیر ترپال ریت، مٹی اور دیگر آلودگی پھیلانے والا سامان لے جانے والی 3 ہزار 752 گاڑیوں کے خلاف کارروائی کی گئی، جبکہ بغیر فٹنس اور خستہ حال 12 ہزار 272 گاڑیوں کے خلاف بھی ایکشن لیا گیا۔

سید عبدالرحیم شیرازی نے بتایا کہ خطرناک حد تک اوور لوڈنگ کرنے والے 5 ہزار 210 ہیوی وہیکلز کے خلاف کارروائی کی جا چکی ہے، جبکہ سموگ تدارک مہم کے دوران مجموعی طور پر ایک لاکھ 54 ہزار 890 گاڑیوں کو چالان ٹکٹس جاری کیے گئے۔

انہوں نے کہا کہ مٹی، ریت اور دیگر مائنز سائٹس پر خصوصی کریک ڈاؤن جاری ہے۔ سموکی وہیکلز کی بروقت درستگی کے لیے متعدد سرکاری اور نیم سرکاری اداروں کو مراسلے بھی ارسال کیے گئے ہیں۔

سی ٹی او لاہور کا کہنا ہے کہ سموگ اور فضائی آلودگی کے تدارک کے لیے ماحولیاتی قوانین کی خلاف ورزی کرنے والی گاڑیوں کے خلاف کارروائیوں کا دائرہ مزید وسیع اور مؤثر بنایا جائے گا، جبکہ آلودگی کا باعث بننے والی گاڑیوں کے خلاف سخت ایکشن جاری رہے گا۔