جولائی میں تنخواہ دار طبقے سے 44 ارب روپے انکم ٹیکس وصول
اسلام آباد: فیڈرل بورڈ آف ریونیو (ایف بی آر) نے رواں مالی سال کے پہلے ماہ جولائی میں تنخواہ دار طبقے سے گزشتہ دو برسوں کے مقابلے میں زیادہ انکم ٹیکس وصول کیا۔
ذرائع کے مطابق جولائی 2026 میں تنخواہ دار طبقے سے 44 ارب روپے انکم ٹیکس جمع کیا گیا، جبکہ مالی سال 2024-25 کے جولائی میں 42 ارب روپے اور مالی سال 2023-24 کے اسی ماہ میں 30 ارب روپے وصول کیے گئے تھے۔
ذرائع کا کہنا ہے کہ انکم ٹیکس کی شرح میں کمی کے باوجود تنخواہ دار طبقے سے ٹیکس وصولی میں اضافہ ہوا ہے۔
واضح رہے کہ حکومت نے رواں مالی سال کے وفاقی بجٹ میں سالانہ 22 لاکھ روپے سے زائد آمدنی رکھنے والے افراد کے لیے مختلف ٹیکس سلیبز میں شرح کم کی تھی۔
22 سے 32 لاکھ روپے سالانہ آمدنی والی سلیب پر ٹیکس کی شرح 23 فیصد سے کم کرکے 20 فیصد، 32 سے 41 لاکھ روپے پر 30 فیصد سے کم کرکے 25 فیصد جبکہ 41 سے 56 لاکھ روپے کی آمدنی پر شرح 35 فیصد سے کم کرکے 29 فیصد کردی گئی۔
اسی طرح 56 سے 70 لاکھ روپے سالانہ آمدنی رکھنے والے افراد کے لیے ٹیکس کی شرح 35 فیصد سے کم کرکے 32 فیصد کردی گئی۔
