لاہور میں مبینہ مغویوں کی بازیابی، عدالت نے کیسز نمٹا دیے
لاہور: مبینہ مغویوں کی بازیابی سے متعلق مختلف کیسز کی سماعت کے دوران پولیس نے مغویوں کو بازیاب کرکے عدالت میں پیش کردیا، جس کے بعد عدالت نے کیسز نمٹا دیے۔
جسٹس غلام سرور نہنگ نے کیسز کی سماعت کی۔ دورانِ سماعت پنجاب حکومت کی جانب سے اسسٹنٹ ایڈووکیٹ جنرل ملک عمر طاہر عدالت میں پیش ہوئے، جبکہ پولیس نے مبینہ مغویوں کی بازیابی سے متعلق رپورٹس عدالت میں جمع کرائیں۔
سماعت کے دوران ایس ایچ او سرگودھا روڈ فیصل آباد، ایس ایچ او بھلوال اور ایس ایچ او بدیانہ سیالکوٹ بھی عدالت میں پیش ہوئے۔ پولیس افسران نے عدالت کو مبینہ مغویوں کی تلاش، بازیابی اور انہیں عدالت میں پیش کرنے سے متعلق کارروائی سے آگاہ کیا۔
عدالت نے پولیس رپورٹس کا جائزہ لینے کے بعد مبینہ مغویوں کی بازیابی اور عدالت میں پیش کیے جانے کی تصدیق کی، جس کے بعد درخواست گزاروں کی جانب سے دائر تمام کیسز نمٹا دیے گئے۔
