اسلام آباد: رانا ثنا اللہ نے کہا ہے کہ فورسز کے ساتھ نہ کھڑے ہونے والی سیاسی جماعت مائنس ہوجائے گی
وزیراعظم کے مشیر برائے سیاسی امور سینیٹر رانا ثنا اللہ نے کہا ہے کہ جو سیاسی جماعت خلوص کے ساتھ فورسز کے ساتھ کھڑی نہیں ہوگی، وہ مائنس ہوجائے گی۔
جیو نیوز کے پروگرام جیو پاکستان میں گفتگو کرتے ہوئے رانا ثنا اللہ نے کہا کہ گورنر خیبرپختونخوا نے 160 ارب روپے کا تقاضا کیا، جس کی وزیراعظم نے فوری منظوری دے دی۔ خیبرپختونخوا سے دہشتگردی کا قلع قمع کیا جائے گا اور دہشتگردی کا خاتمہ حکومت کی اولین ترجیح ہے۔
انہوں نے کہا کہ دہشتگردی ختم کیے بغیر عوام کی زندگی بہتر نہیں بنائی جاسکتی۔ دہشتگردی کے خاتمے کے ایجنڈے میں جو شامل نہیں ہوگا، وہ مائنس ہوگا۔
رانا ثنا اللہ کا کہنا تھا کہ کوئی بھی سیاسی جماعت اگر پورے خلوص کے ساتھ فورسز کے ساتھ کھڑی نہیں ہوتی تو وہ مائنس ہوجائے گی۔
انہوں نے کہا کہ اس وقت 28ویں آئینی ترمیم پر کوئی بات نہیں ہوئی اور نہ ہی اس حوالے سے کوئی مسودہ سامنے آیا ہے۔ دہشتگردی کے خلاف پوری قوم کو متحد ہونا چاہیے۔
