لاہور(ویب ڈیسک) پہلے ون ڈے میچ میں آسٹریلیا نے پاکستان کو جیت کے لیے 314 رنز کا ہدف دے دیا۔
تفصیلات کے مطابق لاہور میں کھیلے جانے والے پہلے ون ڈے میچ میں آسٹریلیا نے مقررہ اوورز میں 7 وکٹوں کے نقصان پر 313 رنز بنائے اور پاکستان کو جیت کے لیے 314 رنز کا ہدف دیا۔
ٹریوس ہیڈ نے 72 گیندوں پر 101 رنز کی شاندار اننگز کھیلی، بین میکڈرموٹ 55 رنز کے ساتھ نمایاں رہے۔
کپتان ایرون فنچ 23 رنز بنا کر زاہد محمود کا نشانہ بنے، مارنوس لبوشین 25 رنز بنا کر پویلین لوٹ گئے، الیکس کیری کو 4 رنز پر زاہد محمود نے بولڈ کیا، مارکس اسٹونس 26 رنز بناسکے۔
شان ایبٹ 14 رنز بنا کر آؤٹ ہوئے، کیمرون گرین 40 رنز کے ساتھ ناٹ آؤٹ رہے۔
پاکستان کی جانب سے زاہد محمود اور حارث رؤف نے دو، دو وکٹیں حاصل کیں، خوشدل شاہ اور افتخار احمد ایک، ایک وکٹ حاصل کرسکے۔
اس سے قبل پاکستان نے ٹاس جیت کر کینگروز کے خلاف پہلے فیلڈنگ کرنے کا فیصلہ کیا تھا۔
آسٹریلیا کے خلاف پہلے ون ڈے میں پاکستان کے دو کھلاڑی ڈیبیو کررہے ہیں، میچ کے آغاز سے قبل زاہد محمود اور محمد وسیم جونیئر کو ڈیبیو کیپ دی گئی ہے۔
پہلے ون ڈے کیلیے پاکستان کے مایہ ناز فاسٹ بولر شاہین آفریدی دستیاب نہیں ہوں گے، کیوں کہ وہ ابھی تک انجری سے مکمل نجات حاصل نہیں کرسکے ہیں اسی لیے انہیں پہلے ون ڈے کیلئے آرام دے دیا گیا ہے۔
دوسری جانب مہمان ٹیم کو بھی بڑا دھچکا ہے کیوں کہ آسٹریلوی ٹیم کے اسپنر ایشٹن ایگر کا کرونا ٹیسٹ مثبت آگیا ہے، جس کے باعث ون ڈے سیریز کےلیے دستیاب نہیں ہوں گے۔
