آئی سی سی کی نئی ٹیسٹ رینکنگ بابراعظم کی 5 درجہ ترقی، سعود شکیل کی تنزلی

آئی سی سی کی نئی ٹیسٹ رینکنگ: بابراعظم کی 5 درجہ ترقی، سعود شکیل کی تنزلی

انٹرنیشنل کرکٹ کونسل (آئی سی سی) نے کھلاڑیوں کی تازہ ترین ٹیسٹ رینکنگ جاری کی ہے، جس میں قومی ٹیم کے سابق کپتان بابر اعظم نے 5 درجے ترقی کے ساتھ 12ویں پوزیشن حاصل کی، جبکہ نائب کپتان سعود شکیل 6 درجے تنزلی کے بعد 11ویں نمبر پر پہنچ گئے ہیں۔

کھیلوں کی ویب سائٹ کرکٹ انفو کے مطابق، بھارت کے خلاف بورڈر گواسکر ٹرافی میں شاندار کارکردگی کے باعث آسٹریلیا کے فاسٹ باؤلر اسکاٹ بولینڈ پہلی بار آئی سی سی کی ٹیسٹ باؤلنگ رینکنگ میں ٹاپ 10 میں شامل ہونے میں کامیاب ہوئے ہیں۔ انہوں نے بھارت کے خلاف آخری ٹیسٹ میچ میں 10 وکٹیں حاصل کیں اور مین آف دی میچ کا اعزاز بھی اپنے نام کیا، جس کی بدولت وہ 29 درجے ترقی کے بعد نویں نمبر پر پہنچ گئے ہیں۔

بورڈر گواسکر ٹرافی میں 32 وکٹیں لینے کے بعد مین آف دی سیریز بننے والے بھارتی باؤلر جسپریت بمراہ اب بھی پہلے نمبر پر موجود ہیں۔ ان کے علاوہ، آسٹریلیا کے کپتان پیٹ کمنز اور جنوبی افریقہ کے کگیسو ربادا بالترتیب دوسرے اور تیسرے نمبر پر ہیں۔

اسی طرح، آسٹریلیا کے فاسٹ باؤلر جوش ہیزل ووڈ ٹاپ تھری سے باہر ہو چکے ہیں، جبکہ پاکستان کے خلاف شاندار کارکردگی دکھانے والے جنوبی افریقہ کے مارکو جانسن ٹیسٹ باؤلرز کی فہرست میں ٹاپ 5 میں شامل ہوگئے ہیں۔

جنوبی افریقہ کے کپتان ٹمبا باووما نے پاکستان کے خلاف سنچری بناتے ہوئے کیریئر کی بہترین پوزیشن یعنی چھٹے نمبر پر پہنچنے میں کامیابی حاصل کی ہے۔ مزید برآں، آسٹریلیا کے خلاف اچھی بلے بازی کرنے والے ریشبھ پانٹ نے 3 درجے ترقی کے ساتھ دوبارہ ٹاپ 10 میں جگہ بنائی ہے، اور وہ اس وقت 9ویں نمبر پر ہیں۔

انگلینڈ کے جو روٹ پہلے، ہیری بروک دوسرے اور نیوزی لینڈ کے کین ولیمسن تیسرے نمبر پر ہیں، جبکہ بھارت کے یشوی جیسوال چوتھے نمبر پر ہیں۔

پاکستان کی جانب سے، بابر اعظم نے دو شاندار اننگز کھیل کر دوبارہ ٹاپ 10 کے قریب پہنچنے کی کوشش کی، جبکہ محمد رضوان نے 2 درجے ترقی پا کر 19ویں پوزیشن حاصل کی۔ اس کے مقابل سعود شکیل 6 درجے نیچے آکر 11ویں نمبر پر آگئے ہیں۔

باؤلنگ کی فہرست میں بھی تبدیلی آئی ہے جہاں نعمان علی 2 درجے تنزلی کے بعد گیارہویں نمبر پر چلے گئے ہیں۔