روس میں غیر معمولی جسامت کی بلی، وزن 17 کلو گرام تک پہنچ گیا

روس میں غیر معمولی جسامت کی بلی، وزن 17 کلو گرام تک پہنچ گیا

ماسکو: روس کے ایک اسپتال میں ایک غیر معمولی جسامت اور وزن رکھنے والی بلی پائی گئی ہے، جس کا وزن تقریباً 17 کلو گرام ہے۔ یہ بلی اپنی جسامت کے لحاظ سے دنیا کی سب سے وزنی بلیوں میں شمار ہو سکتی ہے، جس نے دیکھنے والوں کو حیرت میں ڈال دیا ہے۔

عمومی طور پر بلیوں کا وزن 2.7 کلوگرام سے 4.5 کلوگرام تک ہوتا ہے، جبکہ کچھ خاص نسل کی بلیوں کا وزن زیادہ سے زیادہ 12.5 کلو گرام تک پہنچ سکتا ہے۔ لیکن یہ روسی بلی اپنی جسامت کی وجہ سے ان تمام حدود کو پار کر چکی ہے۔

روس کے شہر پرم کے ایک اسپتال میں ملنے والی اس بلی کا نام کروشک رکھا گیا ہے، جو روسی زبان میں حیرت یا سرپرائز کا مطلب دیتا ہے۔ اس کا نام بلی کی غیر معمولی عادات، خاص طور پر بہت زیادہ کھانے پینے کی وجہ سے رکھا گیا ہے۔

اس بلی کو جانوروں کی مدد کرنے والے ایک ریسکیو گروپ نے ایک ہفتے قبل اسپتال سے ریسکیو کیا تھا۔ بلی کے وزن کی وجہ سے اسے چلنے پھرنے میں دشواری کا سامنا تھا، جس کے باعث گروپ نے اس کے لیے ایک خاص ڈائیٹ پلان ترتیب دیا۔ چند دن کی دیکھ بھال کے بعد، اب بلی اپنی ٹانگوں پر چلنے کے قابل ہو چکی ہے، اور اس کی صحت میں بہتری آ رہی ہے۔

میٹروسکن شیلٹر نامی ریسکیو ادارے نے سوشل میڈیا پر بلی کی ویڈیو پوسٹ کی اور لکھا کہ یہ ایک نایاب کیس ہے۔ ان کا ماننا ہے کہ کروشک دنیا کی پانچ سب سے زیادہ وزنی بلیوں میں سے ایک ہو سکتی ہے۔

کروشک کے غیر معمولی وزن کی وجہ سے اس کا الٹراساؤنڈ بھی ممکن نہیں ہو سکا، کیونکہ مشین کے سینسر بلی کی جسامت اور موٹے چمڑے کی وجہ سے کام نہیں کر پائے۔ ریسکیو گروپ کے مطابق، کروشک کو اسپتال کے عملے کی طرف سے پنیر والی روٹیاں، گوشت، اور وہسکی کھلائی جاتی تھی، جس کی وجہ سے اس کا وزن اس قدر زیادہ ہو گیا۔

مقامی میڈیا کی رپورٹس کے مطابق، کروشک کی غیر متوازن غذا اور زیادہ کھانے کی عادت اس کی غیر معمولی جسامت کا سبب بنی۔ ریسکیو ٹیم نے اسے غذائی پابندیوں کے ذریعے صحت مند بنانے کا عمل شروع کیا ہے تاکہ وہ معمول کی زندگی گزار سکے