بھارت کو دنیا کی مایوس کن جگہ قراردینے پربھارتی سیخ پا
لندن:برطانیہ سے تعلق رکھنے والے نامور یوٹیوبر بنجمن رچ کی جانب سے بھارت کو دنیا کی مایوس کن جگہ قرار دینے پر بھارتی شہریوں میں غم و غصہ پایا جا رہا ہے۔ میڈیا رپورٹس کے مطابق، بنجمن رچ نے حال ہی میں، 6 سال بعد بھارت کا دورہ کیا جس کا مقصد ملک کی ترقی کی رفتار کا جائزہ لینا تھا۔
بنجمن رچ نے اپنے یوٹیوب چینل پر’’میں نے انڈیا کا دورہ کیا، آپ کو کرنے کی ضرورت نہیں‘‘ عنوان کے ساتھ ویڈیو اپلوڈ کی۔ ویڈیو میں انہوں نے دہلی اور کولکتہ کے اپنے سفر میں سڑکوں پر گڑھے، مضر صحت ماحول اور ہجوم سے بھری سڑکیں دکھائیں، جس پر انہیں بھارتی شہریوں کی جانب سے تنقید کا نشانہ بنایا جا رہا ہے۔
بنجمن رچ نے ویڈیو میں غیر ملکی سیاحوں کے لیے انتباہ جاری کرتے ہوئے کہا کہ یہ سفر خود کرنے کی کوشش نہ کریں جب تک کہ آپ پیشہ ور مسافر نہ ہوں۔ یوٹیوبر نے ٹرین میں سفر کرتے ہوئے گندے ڈبے اور جنرل کوچ میں دوسرے مسافروں کی تیز آوازوں کی جھلکیاں شیئر کیں۔
