اسلام آباد (ایم وائے کے نیوز) پاکستان اور بیلاروس کے درمیان فضائی تعاون کے ایک نئے دور کا آغاز متوقع ہے، جہاں بیلاروس کی فضائیہ نے پاک فضائیہ کے تربیتی نظام اور جنگی مہارتوں سے استفادہ کرنے میں گہری دلچسپی ظاہر کی ہے۔
آئی ایس پی آر کے مطابق، بیلاروس ایئر فورس کے کمانڈر میجر جنرل آندرے یولیانووچ لوکیانووچ نے ایئر ہیڈکوارٹرز اسلام آباد کا دورہ کیا، جہاں معزز مہمان کو پاک فضائیہ کے چاق و چوبند دستے نے گارڈ آف آنر پیش کیا۔ دورے کے دوران پاک فضائیہ کے سربراہ اور دیگر اعلیٰ حکام سے ملاقات ہوئی، جس میں فضائی طاقت، دفاعی تعاون اور مشترکہ تربیتی پروگرامز پر تفصیلی تبادلہ خیال کیا گیا۔ ملاقات میں دونوں ممالک کی فضائی افواج کے درمیان تعاون کو فروغ دینے اور دوطرفہ تعلقات کو مزید مضبوط بنانے پر اتفاق کیا گیا۔
بیلاروس کے کمانڈر نے پاک فضائیہ کے تربیتی ماڈل، مشقوں اور جنگی تجربات سے متاثر ہو کر مستقبل میں قریبی اشتراک کی خواہش کا اظہار کیا۔ دونوں ممالک کے درمیان اعلیٰ سطحی تبادلہ پروگرامز کے آغاز پر بھی اتفاق ہوا، اور بیلاروس نے چیف آف دی ایئر اسٹاف کو دفاعی تقریبات میں شرکت کی باضابطہ دعوت دی۔ آئی ایس پی آر کے مطابق، اس ملاقات نے پاکستان اور بیلاروس کے درمیان فضائی شعبے میں تعاون کے ایک نئے باب کا عندیہ دیا ہے، جس میں مسلسل رابطے اور قریبی تعاون پر زور دیا گیا ہے۔
