ترنول جلسے کا این او سی منسوخ ہونے پر پی ٹی آئی عدالت پہنچ گئی
اسلام آباد: پاکستان تحریک انصاف آج ترنول میں ہونے والے جلسے کا این او سی منسوخ ہونے پر عدالت پہنچ گئی۔
اسلام آباد انتظامیہ کی جانب سے اچانک جلسے کا اجازت نامہ منسوخ ہونے پر پاکستان تحریک انصاف کی جانب سے اسلام آباد ہائی کورٹ میں توہین عدالت کی درخواست دائر کر دی گئی ہے ۔
وکیل شعیب شاہین نے دائر درخواست میں مؤقف اپنایا کہ جلسے کے این او سی کے لئے ڈپٹی کمشنر اسلام آباد سے3 جون کو رجوع کیا، عدالت کے فیصلے کی روشنی میں انتظامیہ نے 6 جولائی کا این او سی جاری کیا۔
ٹوئٹ کے ذریعے معلوم ہوا ہے کہ پی ٹی آئی کے جلسے کا این او سی منسوخ ہو گیا ہے۔ اسلام آباد ہائی کورٹ کے حکم کے باوجود جلسے کا این اوسی معطل کرنا توہین عدالت ہے۔این او سی معطل کرنے والوں کے خلاف توہین عدالت کی کارروائی عمل میں لائی جائے۔
جلسے کا اجازت نامہ منسوخ کرنے کے بعد تحریک انصاف کی اعلیٰ قیادت کا مشاورتی اجلاس خیبرپختونخوا ہاؤس میں منعقد ہوا ۔اجلاس میں فیصلہ کیا گیا ہے کہ تحریک انصاف ترنول میں آج ہر صورت جلسہ کرے گا ۔ انہوں نے بتایا کہ کارکنوں کی آمد کا سلسلہ جاری ہے۔ قافلے 3بجے کے قریب ترنول پہنچنا شروع ہو جائیں گے۔
جلسے کا اجازت نامہ منسوخ کرنے کے بعد پولیس کی بھاری نفری ترنول جلسہ گاہ پہنچی اور جلسہ گاہ خالی کروانے کے ساتھ پنڈال میں سٹیج کے لئے رکھے گئے کنٹینرز کو بھی ہٹا دیا گیا۔ پولیس کا مؤقف ہے کہ جلسے کے لئے این او سی نہیں اس لئے جگہ خالی کروائی جارہی ہے۔
