عمران خان کی ممکنہ حراست آرمی کو دینے کیخلاف لاہور ہائی کورٹ میں درخواست
لاہور:بانی پاکستان تحریک انصاف ( پی ٹی آئی) عمران خان نے اپنی ممکنہ حراست آرمی کو دینے کے خلاف لاہور ہائی کورٹ میں درخواست دائر کردی۔سابق وزیر اعظم نے عزیر کرامات بنڈاری کی توسط سے لاہورہائی کورٹ میں درخواست دائر کی،وفاقی حکومت اور چاروں صوبوں کے انسپکٹر جنرل (آئی جیز) کودرخواست میں فریق بنایا گیا ہے۔
بانی پی ٹی آئی نے مؤقف اپنایا کہ 9 مئی سے متعلق کیسز میں میری حراست آرمی کے حوالے کی جاسکتی ہے چنانچہ عدالت 9 مئی کے کیسز میں حراست سویلین کورٹس کے پاس رہنے کا حکم دے۔انہوں نے استدعا کی کہ عدالت ممکنہ حراست آرمی کو دینے کیخلاف حکم جاری کرے۔یاد رہے کہ لاہور ہائی کورٹ نے عمران خان کا 12 مقدمات میں جسمانی ریمانڈ کالعدم قرار دے دیا ہے۔لاہور ہائی کورٹ نے عمران خان کی ویڈیو لنک پر حاضری کا نوٹیفکیشن بھی کالعدم قرار دے دیا۔جسٹس طارق سلیم شیخ کی سربراہی میں 2 رکنی بینچ نے کیس کی سماعت کی۔
