محسن نقوی کو آئی سی سی میں اہم ذمہ داری مل سکتی ہے، بھارتی میڈیا
بھارتی میڈیا کی حالیہ رپورٹوں کے مطابق، بھارتی کرکٹ بورڈ (بی سی سی آئی) کے چیئرمین جے شاہ کی انٹرنیشنل کرکٹ کونسل (آئی سی سی) کے صدر منتخب ہونے کے بعد اہم عہدے کی ذمہ داری پاکستان کرکٹ بورڈ (پی سی بی) کے چیئرمین محسن نقوی کے حوالے کی جا سکتی ہے۔ این ڈی ٹی وی اور پریس ٹرسٹ آف انڈیا (پی ٹی آئی) کی رپورٹس کے مطابق، محسن نقوی ایشیئن کرکٹ کونسل (اے سی سی) کے چیئرمین بننے کے لیے ایک مضبوط امیدوار ہیں۔
جے شاہ نے 27 اگست کو اعلان کیا کہ وہ آئی سی سی کے بلامقابلہ صدر منتخب ہو گئے ہیں اور وہ دسمبر میں موجودہ چیئرمین گریگ بارکلے کی جگہ لیں گے۔ اس انتخاب کے بعد جے شاہ کو بھارتی کرکٹ بورڈ اور ایشیئن کرکٹ کونسل کی صدارت چھوڑنی پڑے گی، جس کے نتیجے میں دونوں عہدوں پر نئی قیادت کی ضرورت ہوگی۔
بھارتی میڈیا کے مطابق، محسن نقوی ایشیئن کرکٹ کونسل کی صدارت کے لیے سب سے آگے ہیں، اور اس بات کا اعلان اسی سال متوقع ہے۔ پی ٹی آئی کے ذرائع نے بتایا ہے کہ محسن نقوی کو اگلے دو سال کے لیے اے سی سی کے چیئرمین منتخب کرنے کی تصدیق کی جائے گی، جب جے شاہ اپنے نئے عہدے پر فائز ہو جائیں گے۔
