لاہور دنیا کا سب سے آلودہ شہر بن گیا، ایئر کوالٹی انڈیکس خطرناک سطح پر
لاہور: صوبائی دارالحکومت لاہور نے دنیا بھر کے آلودہ ترین شہروں کی فہرست میں سب کو پیچھے چھوڑ دیا ہے، اور شہر کی فضائی آلودگی خطرناک حد تک پہنچ چکی ہے۔ محکمہ موسمیات کے مطابق، لاہور کی ایئر کوالٹی انڈیکس (AQI) 191 تک جا پہنچا ہے، جو صحت کے لیے انتہائی مضر ہے اور شہریوں کی زندگیوں پر منفی اثرات مرتب کر رہا ہے۔
فضائی آلودگی کے بڑھنے کی بنیادی وجوہات میں ٹریفک کا بے تحاشا دباؤ، فیکٹریوں سے نکلنے والا دھواں، اور موسم کی تبدیلیاں شامل ہیں۔ اکتوبر کا مہینہ شروع ہوتے ہی سموگ کی شدت بھی بڑھ جائے گی
آلودگی سے سب سے زیادہ متاثر ہونے والے افراد میں بچے، بزرگ، اور سانس کے مریض شامل ہیں، جو براہِ راست آلودگی کا شکار ہو سکتے ہیں۔
حکومت کی جانب سے فضائی آلودگی کو کم کرنے کے لیے مختلف اقدامات کیے جا رہے ہیں، جیسے کہ گاڑیوں کے انجن کی جانچ، صنعتی علاقوں میں فضائی اخراج کی نگرانی، اور درخت لگانے کی مہمات، تاکہ شہر کی فضا کو صاف اور صحت مند بنایا جا سکے۔
عالمی درجہ بندی میں لاہور کو آلودگی کے اعتبار سے سرِفہرست قرار دیا جا چکا ہے، جو کہ شہریوں کے لیے ایک لمحہ فکریہ ہے۔ دنیا کے دیگر بڑے شہروں کے مقابلے میں لاہور کی فضائی آلودگی کی سطح کہیں زیادہ خطرناک ہے۔
