پاکستانی شہریت حاصل کرنے کے لیے کم از کم 5 سال پاکستان میں قیام کی شرط لگادی گئی ہے۔
وزیراعظم شہباز شریف کی زیر صدارت وفاقی کابینہ کا اجلاس منعقد ہوا جس میں متعدد اہم فیصلے کیے گئے۔
کابینہ نے فیصلہ کیا کہ جو افراد بیرون ملک جا کر بھیک مانگیں گے، ان کے پاسپورٹ ضبط کر لیے جائیں گے اور ان پر بھاری جرمانے عائد کیے جائیں گے۔
وفاقی کابینہ نے پاسپورٹ اور شہریت کے قوانین میں اہم ترامیم کی منظوری دی ہے۔ حکومتی ذرائع کے مطابق، پاکستانی شہریت کے لیے کم از کم 5 سال تک پاکستان میں قیام ضروری قرار دیا گیا ہے۔
ذرائع کا مزید کہنا ہے کہ پاکستان میں مہاجر یا سفارت کار کی حیثیت سے قیام کرنے والوں کو شہریت کی اہلیت حاصل نہیں ہوگی۔ یہ فیصلہ افغان خواتین کی پاکستانی مردوں سے شادی کے قانونی درپیش مسائل کے بعد کیا گیا ہے۔
