سکیورٹی اداروں کو دھمکیاں دینا خالد خورشید کو مہنگا پڑ گیا، 34 سال قید، 6 لاکھ جرمانہ

گلگت:انسدادِ دہشتگردی عدالت نے سابق وزیراعلیٰ گلگت بلتستان خالد خورشید کو سکیورٹی اداروں کو دھمکیاں دینے کے مقدمے میں 34 سال قید اور 6 لاکھ روپے جرمانے کی سزا سنائی۔
سابق وزیراعلیٰ خالد خورشید کے خلاف مقدمے کی سماعت انسدادِ دہشتگردی عدالت گلگت میں ہوئی، جس میں ان پر سکیورٹی اداروں اور چیف الیکشن کمشنر کے خلاف دھمکی آمیز اور نازیبا زبان استعمال کرنے کے الزامات ثابت ہوئے۔
عدالت نے خالد خورشید کو 34 سال قید اور 6 لاکھ روپے جرمانے کی سزا دی، ساتھ ہی ڈی جی نادرا کو ان کا شناختی کارڈ بلاک کرنے کا حکم جاری کیا۔ آئی جی پولیس کو ہدایت دی گئی کہ مجرم کو فوراً گرفتار کر کے جیل منتقل کیا جائے۔
یاد رہے کہ خالد خورشید، جو تحریک انصاف کے رہنما اور سابق وزیراعلیٰ گلگت بلتستان ہیں، نے ایک جلسے کے دوران سکیورٹی اداروں، چیف سیکرٹری، اور چیف الیکشن کمشنر گلگت بلتستان کو سنگین نتائج کی دھمکیاں دی تھیں۔ ان کے خلاف سٹی تھانہ گلگت میں مقدمہ درج کیا گیا تھا۔