پنجاب اسمبلی کے حلقہ پی پی 52 سیالکوٹ میں ہونے والے ضمنی انتخاب میں مسلم لیگ (ن) نے واضح برتری کے ساتھ کامیابی حاصل کر لی۔ سمبڑیال میں صوبائی اسمبلی کی نشست پر ہونے والی پولنگ یکم جون کو صبح 8 بجے سے شام 5 بجے تک جاری رہی، جس دوران ووٹرز کی بڑی تعداد نے اپنا حقِ رائے دہی استعمال کیا۔
پولنگ کے دوران عمومی طور پر پرامن ماحول رہا، تاہم مختلف مقامات پر سیاسی کارکنوں کے درمیان جھگڑے اور نعرے بازی کی اطلاعات بھی موصول ہوئیں، جبکہ بعض جماعتوں کی جانب سے دھاندلی کے الزامات بھی سامنے آئے۔
تمام 185 پولنگ اسٹیشنز کے غیر حتمی اور غیر سرکاری نتائج کے مطابق مسلم لیگ (ن) کی امیدوار حنا ارشد وڑائچ نے 78,419 ووٹ حاصل کرکے میدان مار لیا۔ پی ٹی آئی کے حمایت یافتہ آزاد امیدوار فاخر نشاط گھمن 40,037 ووٹوں کے ساتھ دوسرے نمبر پر رہے۔
کامیابی کے بعد میڈیا سے گفتگو کرتے ہوئے حنا ارشد وڑائچ نے کہا کہ عوام نے انہیں سیاست نہیں بلکہ خدمت کے لیے منتخب کیا ہے۔ انہوں نے کہا کہ وہ وزیراعلیٰ پنجاب مریم نواز کی مرہونِ منت ہیں جن کے اعتماد کے بغیر یہ کامیابی ممکن نہ تھی۔
وزیراعلیٰ پنجاب مریم نواز نے بھی حنا ارشد وڑائچ کو مبارکباد دیتے ہوئے کہا کہ سمبڑیال کے عوام نے جس اعتماد کا مظاہرہ کیا، مسلم لیگ (ن) اس پر پورا اترے گی۔ ان کا کہنا تھا کہ یہ فتح عوام کے حکومت کی پالیسیوں پر اعتماد کا اظہار ہے اور اس بات کا ثبوت ہے کہ عوام ترقی اور خدمت کے ایجنڈے کو ترجیح دیتے ہیں۔ انہوں نے مزید کہا کہ نواز شریف کی قیادت میں ترقی کا سفر پوری قوت سے جاری ہے اور عوام فتنہ و فساد پھیلانے والوں کو بخوبی پہچان چکے ہیں۔
