شہر قائد ایک بار پھر لرزہ خیز واردات سے دہل گیا، جہاں 8 بیٹیوں کی ضعیف ماں کو بہیمانہ تشدد کے بعد قتل کر دیا گیا۔ 60 سالہ مقتولہ کی لاش کراچی کے علاقے شاہ لطیف ٹاؤن سیکٹر A-21 کی جھاڑیوں سے ملی، جس نے نہ صرف اہل علاقہ بلکہ پولیس حکام کو بھی شدید تشویش میں مبتلا کر دیا ہے۔
پولیس ذرائع کے مطابق اطلاع ملنے پر موقع پر پہنچ کر ضابطے کی کارروائی کے بعد لاش کو فوری طور پر اسپتال منتقل کیا گیا، جہاں ابتدائی میڈیکل رپورٹ میں خاتون پر بدترین تشدد کی تصدیق ہوئی۔ بعدازاں لاش کو سرد خانے منتقل کر دیا گیا۔تفتیشی ذرائع کے مطابق مقتولہ کچھ دن قبل ناظم آباد سے لاپتہ ہوئی تھی، تاہم یہ فوری طور پر تصدیق نہیں ہو سکی کہ شاہ لطیف ٹاؤن سے ملنے والی لاش ناظم آباد سے لاپتہ ہونے والی ہی خاتون کی ہے یا نہیں۔ تاہم اہل خانہ کی جانب سے خاتون کی شناخت کر لی گئی ہے، جس کے بعد لاش ورثا کے حوالے کر دی گئی ہے۔
اہل علاقہ نے واقعے پر شدید غم و غصے کا اظہار کرتے ہوئے پولیس سے مطالبہ کیا ہے کہ جلد از جلد قاتلوں کو گرفتار کیا جائے اور اس سفاکانہ جرم میں ملوث عناصر کو کڑی سے کڑی سزا دی جائے۔ اطلاعات کے مطابق مقتولہ کی 8 بیٹیاں ہیں، جو اس صدمے سے شدید متاثر ہیں اور انصاف کی منتظر ہیں۔ پولیس نے قتل کی اس واردات کو "پراسرار” قرار دیتے ہوئے واقعے کی مختلف زاویوں سے تفتیش شروع کر دی ہے۔ قریبی علاقوں میں سی سی ٹی وی فوٹیج بھی حاصل کی جا رہی ہے اور مقتولہ کے روابط و معمولات کا بھی جائزہ لیا جا رہا ہے تاکہ واقعے کی کڑیاں جوڑ کر ملزمان تک پہنچا جا سکے۔
