لاہور چیمبر آف کامرس اینڈ انڈسٹری کے انتخابات میں صرف 9 روز باقی رہ گئے، بزنس کمیونٹی کے سب سے بڑے انتخابی دنگل کا میدان 23 ستمبر کو سجے گا۔ انتخابات قریب آتے ہی امیدواروں اور مختلف انتخابی اتحادوں کی جانب سے رابطہ مہم میں تیزی آ گئی۔
پی پی بی اے الائنس کی انتخابی مہم بھی بھرپور انداز میں جاری ہے۔ ایسوسی ایٹ کلاس کے امیدوار سفیر بشیر نے مختلف مارکیٹوں کا دورہ کیا اور تاجر برادری سے ملاقاتیں کرکے اپنی انتخابی مہم کو آگے بڑھایا۔
اس موقع پر باؤ بشیر، شیراز بشیر اور حسیب بشیر بھی سفیر بشیر کے ہمراہ موجود تھے۔ امیدوار نے مختلف مارکیٹوں کے تاجروں سے ملاقاتیں کیں اور انہیں اپنے انتخابی منشور، ترجیحات اور آئندہ کے لائحہ عمل سے آگاہ کیا۔
سابق رکن قومی اسمبلی وحید عالم خان نے بھی سفیر بشیر سے ملاقات کی اور ان کی حمایت کا اعلان کیا۔ ملاقات کے دوران کاروباری برادری کو درپیش مسائل، لاہور چیمبر کے کردار اور آئندہ انتخابات کے حوالے سے تفصیلی تبادلہ خیال کیا گیا۔
انتخابی سرگرمیوں میں تیزی کے باعث شہر کی مختلف مارکیٹوں میں امیدواروں کی جانب سے رابطہ مہم اور حمایت حاصل کرنے کی کوششیں بھی زور پکڑ گئی ہیں۔
