صوابی: خیبر پختونخوا کے ضلع صوابی میں فیڈرل بورڈ آف ریونیو (ایف بی آر) کے ویئر ہاؤس سے 25 کروڑ روپے مالیت کے سگریٹ غائب ہونے کا انکشاف ہوا ہے، جس پر وفاقی تحقیقاتی ادارے (ایف آئی اے) نے مقدمہ درج کرلیا۔
ایف آئی اے کی جانب سے درج ایف آئی آر میں ایف بی آر کے افسران اور ایک سگریٹ کمپنی کے اہلکار کو نامزد کیا گیا ہے۔ مقدمے میں ملزمان پر اختیارات کے ناجائز استعمال، غفلت اور مبینہ ملی بھگت کے الزامات عائد کیے گئے ہیں۔
ایف آئی آر کے مطابق ویئر ہاؤس میں اسٹاک رجسٹر، سی سی ٹی وی کیمروں کی ریکارڈنگ اور آمدورفت سے متعلق ریکارڈ دستیاب نہیں تھا۔
ایف آئی اے کے مطابق تحقیقات کے دوران مزید ایف بی آر افسران اور دیگر افراد کے کردار کا تعین کیا جائے گا، جبکہ معاملے کے مختلف پہلوؤں کی چھان بین جاری ہے۔
