پشاور: خیبر پختونخوا کے دارالحکومت پشاور کے علاقے ٹاؤن میں ایک خاتون نے مبینہ طور پر اپنی 13 سالہ بیٹی کو پھانسی دے کر قتل کردیا، پولیس نے والدہ کو گرفتار کرکے واقعے کی تحقیقات شروع کردی ہیں۔
پولیس کے مطابق خاتون نے تھانہ ٹاؤن پہنچ کر اپنی بیٹی کو قتل کرنے کا اعتراف کیا، جس کے بعد اسے حراست میں لے لیا گیا۔ واقعے میں ملوث کسی دوسرے شخص کی تاحال گرفتاری عمل میں نہیں آئی۔
ایس پی کینٹ نے بتایا کہ ایف آئی آر میں درج خاتون کے بیان کے مطابق اس نے بیٹی کی رضامندی سے اسے پھانسی دی۔
پولیس کے مطابق واقعے کی مزید تفتیش جاری ہے، جبکہ مقتولہ کے والد اور دیگر رشتے داروں کے خلاف چھاپے مارے جا رہے ہیں تاکہ واقعے میں ان کے ممکنہ کردار کا تعین کیا جاسکے۔
