گاڑیوں کی تعداد میں 770 فیصد سے زائد اضافہ، فضائی آلودگی سنگین ہوگئی
اسلام آباد: پاکستان میں گاڑیوں کی تعداد میں گزشتہ تین دہائیوں کے دوران 770 فیصد سے زائد اضافے کے باعث فضائی آلودگی میں بھی نمایاں اضافہ ہوا ہے۔
تازہ تحقیق کے مطابق ملک میں 1990 میں گاڑیوں کی تعداد 44 لاکھ 70 ہزار تھی، جو 2025 تک بڑھ کر 3 کروڑ 90 لاکھ سے تجاوز کرگئی۔
تحقیق کے مطابق کاربن ڈائی آکسائیڈ کا اخراج 1990 میں ایک کروڑ 38 لاکھ ٹن تھا، جو 2023 میں بڑھ کر 4 کروڑ 36 لاکھ ٹن ہوگیا۔
لاہور میں کاربن ڈائی آکسائیڈ کے اخراج میں ٹرانسپورٹ کا حصہ 81.3 فیصد ہے، جبکہ کراچی میں ٹرانسپورٹ فضائی آلودگی میں 33 فیصد، اسلام آباد اور راولپنڈی میں 53 فیصد اور پشاور میں 51 فیصد حصہ ڈالتی ہے۔
تحقیق میں یہ بھی بتایا گیا ہے کہ فضائی آلودگی کے باعث پاکستان میں متوقع اوسط عمر میں 7 سال تک کمی کا اندازہ لگایا گیا ہے۔
