اسلام آباد: وزیراعظم اپنا گھر پروگرام کے تحت ہاؤسنگ قرض کے لیے ضروری کاغذات کی تعداد 5 کردی گئی
اسلام آباد: وزیراعظم اپنا گھر پروگرام کے تحت ہاؤسنگ قرض کے حصول کے لیے ضروری دستاویزات کی تعداد کم کرکے 5 کردی گئی ہے۔
وزارتِ ہاؤسنگ اینڈ ورکس کے مطابق ہاؤسنگ قرض کے لیے درکار دستاویزات میں ٹرانسفر، پوزیشن لیٹر، نقشہ، رہن رکھنے کی اجازت کا خط اور اندراجِ رہن شامل ہیں۔ اس حوالے سے بینکوں کو ضروری ہدایات بھی جاری کردی گئی ہیں۔
وزارتِ ہاؤسنگ اینڈ ورکس کے ترجمان نے بتایا کہ وزیراعظم اپنا گھر پروگرام ملک بھر میں جاری ہاؤسنگ قرضوں کا ایک اہم منصوبہ ہے، جس کے تحت حکومتِ پاکستان کی جانب سے پہلی بار گھر بنانے کے لیے ایک کروڑ روپے تک قرض فراہم کیا جا رہا ہے۔
وزارت کے مطابق اسکیم کے تحت ہاؤسنگ فنانس کے لیے بینکوں کو درکار دستاویزات کو محدود اور معیاری بنایا گیا ہے، تاکہ شہریوں کے لیے قرض کے حصول کا عمل مزید آسان بنایا جاسکے۔
