اسلام آباد (ایم وائے کے نیوز) وفاقی حکومت نے اسمگل شدہ گاڑیوں کے خلاف سخت کارروائی کے لیے نیا قانون تجویز کر دیا ہے جس کے تحت چیسس نمبر میں چھیڑ چھاڑ یا تبدیلی کی صورت میں گاڑی کو اسمگل شدہ تصور کیا جائے گا اور فوراً ضبط کر لیا جائے گا۔ مجوزہ قانون کے مطابق اگر کسی گاڑی کے چیسس نمبر میں کٹ اینڈ ویلڈ کیا گیا ہو یا اس میں ایسا کوئی مواد بھرا گیا ہو جو اس کی اصل حالت کو چھپانے کے لیے استعمال ہوا ہو، تو اسے اسمگل شدہ گاڑی سمجھا جائے گا چاہے وہ کسی بھی موٹر رجسٹریشن اتھارٹی سے رجسٹرڈ ہو۔
قانون کے تحت گاڑیوں کی فارنزک تحقیقات کی جائیں گی تاکہ چیسس نمبر کی اصلیت کا پتا لگایا جا سکے۔ اگر تحقیقات میں ثابت ہو جائے کہ چیسس نمبر میں ردوبدل کیا گیا ہے تو ایسی گاڑی فوری طور پر ریاست کی تحویل میں لے لی جائے گی۔ مجوزہ قانون کا مقصد اسمگلنگ، گاڑیوں کی چوری اور غیر قانونی تجارت کی روک تھام ہے تاکہ سڑکوں پر صرف قانونی اور محفوظ گاڑیاں ہی چل سکیں۔
حکام نے عوام کو خبردار کیا ہے کہ وہ ایسی کسی گاڑی کی خریداری سے اجتناب کریں جس کے چیسس نمبر میں غیر معمولی تبدیلی یا چھیڑ چھاڑ کی گئی ہو۔ شہریوں سے کہا گیا ہے کہ وہ گاڑی خریدنے سے پہلے اس کی فارنزک چیکنگ ضرور کروائیں تاکہ کسی قانونی پیچیدگی سے بچا جا سکے۔ حکومت کے مطابق یہ اقدام گاڑیوں کی قانونی حیثیت کو یقینی بنانے اور کار مارکیٹ کو شفاف بنانے میں مدد دے گا۔
