لاہور (ایم وائے کے نیوز) یوٹیوبر رجب بٹ اور اس کے ساتھیوں کے خلاف زیادتی اور بلیک میلنگ کا مقدمہ درج کر لیا گیا ہے۔ تھانہ نواب ٹاؤن میں یہ مقدمہ سوشل میڈیا ایکٹوسٹ عائشہ شرافت کی درخواست پر درج کیا گیا، جس میں رجب بٹ، مان ڈوگر، جواد حیدر، جہانگیر بٹ اور سلمان حیدر کو نامزد کیا گیا ہے۔
ایف آئی آر کے متن کے مطابق سوشل میڈیا پر دوستی کے بعد عائشہ شرافت کو نشہ آور چیز پلا کر زیادتی کا نشانہ بنایا گیا اور اس دوران نازیبا ویڈیو بھی بنائی گئی جسے بعد ازاں بلیک میلنگ کے لیے استعمال کیا گیا۔ پولیس حکام کا کہنا ہے کہ مقدمہ درج ہونے کے بعد ملزمان کی گرفتاری کے لیے چھاپے مارے جا رہے ہیں اور جلد انہیں قانون کے کٹہرے میں لایا جائے گا۔ پولیس کا مزید کہنا ہے کہ متاثرہ خاتون کو مکمل قانونی تحفظ فراہم کیا جائے گا اور مقدمے کی تفتیش میرٹ پر کی جائے گی۔
