کراچی (ایم وائے کے نیوز ) کراچی کے پوش علاقے ڈیفنس میں نوجوان پر بہیمانہ تشدد کے الزام میں گرفتار کیے گئے ملزم سلمان فاروقی کو عدالت میں پیش کیا گیا، جہاں پیشی کے بعد ان پر عوام اور وکلاء کی جانب سے شدید ردعمل دیکھنے میں آیا۔ اطلاعات کے مطابق ایک وکیل نے سلمان فاروقی کو تھپڑ مارا، جس کے بعد موقع پر موجود دیگر افراد نے بھی ملزم کو تھپڑوں اور لاتوں کا نشانہ بنایا۔
واقعہ اس وقت پیش آیا جب عدالت میں کارروائی مکمل ہونے کے بعد سلمان فاروقی کو باہر لایا گیا۔ عوامی غصے کی یہ لہر نوجوان پر ہونے والے بےرحمانہ تشدد کے خلاف شدید جذبات کی عکاسی کرتی ہے، جس کی ویڈیوز سوشل میڈیا پر وائرل ہو چکی ہیں۔
ذرائع کے مطابق اب تک اس واقعے میں ملوث چار افراد کو گرفتار کیا جا چکا ہے، جن پر نوجوان کو سڑک پر روک کر تشدد کرنے اور قانون کی خلاف ورزی کا الزام ہے۔ پولیس کا کہنا ہے کہ مزید افراد کی شناخت کے لیے تفتیش جاری ہے، اور جو بھی اس واقعے میں ملوث پایا گیا، اسے قانون کے مطابق سزا دی جائے گی۔
