اسلام آباد (ایم وائے کے نیوز ٹی وی) اسلام آباد میں ٹک ٹاکر ثناء یوسف کے قتل کیس میں اہم پیشرفت سامنے آئی ہے، جہاں مرکزی ملزم عمر حیات کو ڈسٹرکٹ اینڈ سیشن کورٹ میں پیش کیا گیا۔ پولیس نے ملزم کو علاقہ مجسٹریٹ محمد حفیظ کی عدالت میں پیش کرتے ہوئے سات روزہ جسمانی ریمانڈ کی استدعا کی، جس پر عدالت نے دلائل سننے کے بعد چار روزہ جسمانی ریمانڈ منظور کر لیا۔
پولیس کے مطابق شناخت پریڈ مکمل ہو چکی ہے، جس میں مقتولہ کی والدہ اور پھوپھو نے عدالت میں ملزم کی شناخت کی۔ پراسیکیوشن نے مؤقف اختیار کیا کہ ملزم سے واردات میں استعمال ہونے والا موبائل فون اور گاڑی برآمد کرنا باقی ہے، جس کے لیے مزید جسمانی ریمانڈ ضروری ہے۔ عدالت میں پیشی کے دوران ملزم عمر حیات نے دعویٰ کیا کہ اس نے موبائل فون پولیس کے حوالے کر دیا ہے اور میڈیکل کروانے کی درخواست کی، جس پر عدالت نے میڈیکل کا حکم جاری کر دیا۔ اس نے مزید بتایا کہ اس کا اپنے اہل خانہ سے تاحال کوئی رابطہ نہیں ہو سکا اور وہ نہیں جانتا کہ اسے وکیل کرنا ہے یا نہیں۔
عدالت نے تمام فریقین کے دلائل سننے کے بعد ملزم کو چار روزہ جسمانی ریمانڈ پر پولیس کے حوالے کر دیا، جس کے بعد مزید تفتیش کا عمل جاری رکھا جائے گا۔