گجرات میں ایک اور ٹک ٹاکر قتل، نامعلوم افراد کی فائرنگ سے مقدس عباس جاں بحق

گجرات (ایم وائے کے نیوز ٹی وی) — پنجاب کے ضلع گجرات میں سوشل میڈیا کی دنیا سے وابستہ ایک اور نوجوان کی زندگی کا چراغ گل کر دیا گیا۔ نواحی علاقے جلالپور جٹاں میں نامعلوم افراد نے فائرنگ کر کے معروف ٹک ٹاکر مقدس عباس کو موت کے گھاٹ اتار دیا۔

پولیس کے مطابق واقعہ اس وقت پیش آیا جب موٹر سائیکل سوار ملزمان نے مقدس عباس کا تعاقب کیا اور موقع پا کر اندھا دھند فائرنگ کر دی۔ گولیاں لگنے سے مقدس عباس موقع پر ہی دم توڑ گیا، جب کہ حملہ آور فائرنگ کے بعد فرار ہونے میں کامیاب ہو گئے۔mپولیس نے لاش کو تحویل میں لے کر پوسٹ مارٹم کے لیے قریبی اسپتال منتقل کر دیا ہے، اور واقعے کی تحقیقات کا آغاز کر دیا گیا ہے۔ ذرائع کا کہنا ہے کہ مقتول ٹک ٹاک پلیٹ فارم پر خاصی مقبولیت رکھتے تھے اور حالیہ دنوں میں ان کے سوشل میڈیا فالورز کی تعداد میں بھی تیزی سے اضافہ ہو رہا تھا۔

پنجاب پولیس کے ترجمان نے بتایا کہ حملہ آوروں کی تلاش کے لیے مختلف مقامات پر چھاپے مارے جا رہے ہیں اور سی سی ٹی وی فوٹیج کے ذریعے ملزمان کا سراغ لگانے کی کوشش کی جا رہی ہے۔ اہل علاقہ اور مقتول کے اہل خانہ نے واقعے پر شدید غم و غصے کا اظہار کرتے ہوئے فوری انصاف کی اپیل کی ہے۔

یاد رہے کہ اس سے قبل اسلام آباد میں بھی ایک معروف خاتون ٹک ٹاکر ثنا یوسف کو ان کے اپنے گھر میں بے دردی سے قتل کر دیا گیا تھا، جس نے سوشل میڈیا پر شدید ردعمل کو جنم دیا تھا۔ ان پے در پے واقعات نے ٹک ٹاکرز اور سوشل میڈیا شخصیات کی سیکیورٹی پر سوالیہ نشان لگا دیا ہے۔