پشاور میں اسکول منہدم، مالک نے حادثے کی وجہ بارشیں قرار دے دی

پشاور میں اسکول منہدم، مالک نے حادثے کی وجہ بارشیں قرار دے دی

پشاور: منہدم ہونے والے نجی اسکول کے مالک خان محمد نے کہا ہے کہ اسکول کی عمارت بارشوں کے باعث منہدم ہوئی۔

خان محمد کے مطابق اسکول کی بنیاد تقریباً ڈیڑھ سال قبل رکھی گئی تھی اور گزشتہ کئی روز سے بارشیں جاری تھیں، جس کے باعث یہ حادثہ پیش آیا۔

انہوں نے بتایا کہ وہ صبح خود متاثرہ کلاس میں گئے تھے، حادثہ پیش آنے کے بعد تمام اساتذہ کو بلا کر بچوں کو نکالنے کا عمل شروع کیا گیا۔ دوسری منزل پر صرف ایک کمرہ منہدم ہوا، جس کے باعث نیچے موجود کمرے بھی گر گئے۔

اسکول مالک کے مطابق متاثرہ کلاس میں تقریباً 30 بچے موجود تھے جبکہ مجموعی طور پر اسکول میں 350 طلبہ زیر تعلیم تھے۔

دوسری جانب سیکرٹری ایجوکیشن عنایت اللہ وسیم نے کہا ہے کہ اسکول کی عمارت مخدوش حالت میں تھی، تاہم محکمہ تعلیم کو عمارت کی حالت سے متعلق کسی نے آگاہ نہیں کیا تھا۔

انہوں نے بتایا کہ واقعے کی وجوہات جاننے کے لیے انکوائری کمیٹی تشکیل دے دی گئی ہے جبکہ سرکاری اور نجی تعلیمی اداروں کی عمارتوں کا معائنہ بھی کیا جائے گا۔

سیکرٹری ایجوکیشن کے مطابق حادثے میں زخمی ہونے والے بچوں کے علاج کے اخراجات حکومت برداشت کرے گی۔