معروف ٹک ٹاکر منشیات فروشی کے الزام میں گرفتار، تفتیش کے دوران اہم انکشافات

کراچی (ایم وائے کے نیوز ٹی وی) — کراچی کے پوش علاقے ڈیفنس میں سرگرم معروف ٹک ٹاکر بابرہ عرف "بیبو” کو منشیات فروشی کے الزام میں گرفتار کرلیا گیا۔ پولیس ذرائع کے مطابق ملزمہ سے ابتدائی تفتیش میں انتہائی چونکا دینے والے انکشافات سامنے آئے ہیں۔

پولیس حکام نے "ایم وائے کے نیوز ٹی وی” کو بتایا کہ بابرہ عرف بیبو ڈیفنس، کلفٹن اور دیگر پوش علاقوں میں آئس اور کوکین جیسی خطرناک نشہ آور اشیاء کی سپلائی میں ملوث پائی گئی ہے۔ ملزمہ نے تفتیش کے دوران انکشاف کیا کہ وہ مختلف ہائی پروفائل پارٹیز میں شرکت کے بہانے منشیات لے جایا کرتی تھی، اور سوشل میڈیا پلیٹ فارمز خصوصاً ٹک ٹاک کے ذریعے اپنے ممکنہ خریداروں سے رابطہ کرتی تھی۔

پولیس کا کہنا ہے کہ گرفتار ٹک ٹاکر کے قبضے سے آئس (کرسٹل میتھ) بھی برآمد کرلی گئی ہے جبکہ اس کے منشیات فروش نیٹ ورک میں شامل دیگر ساتھیوں کی تلاش بھی جاری ہے۔ حکام کے مطابق ملزمہ اس سے قبل چوری کے کم از کم دو مقدمات میں بھی گرفتار ہو چکی ہے اور وہ پولیس کے ریڈار پر پہلے سے موجود تھی۔

ابتدائی انٹروگیشن رپورٹ کے مطابق بابرہ عرف بیبو سوشل میڈیا پر اپنی گلیمرس اور بے باک شخصیت کے باعث نوجوانوں میں خاصی مقبول تھی، اور اسی شہرت کو منشیات کی ڈیلنگ کے لیے بطور "کور” استعمال کرتی تھی۔ پولیس کا کہنا ہے کہ اس کیس میں جلد ہی مزید گرفتاریاں متوقع ہیں اور پارٹیز کے منتظمین، خریداروں اور سہولت کاروں کو بھی قانون کے کٹہرے میں لایا جائے گا۔ شہر میں منشیات فروشوں کے خلاف جاری کریک ڈاؤن میں یہ گرفتاری ایک بڑی کامیابی تصور کی جا رہی ہے۔